Հայաստանի արդարադատության նախարարը Ալիևի պահանջները նախապայման չի համարում

Հայաստանի արդարադատության նախարար Սրբուհի Գալյանը հայտարարել է, որ Ադրբեջանի նախագահ Իլհամ Ալիևի պահանջները չի դիտարկում որպես նախապայմաններ խաղաղության պայմանագրի կնքման համար։ Նախարարն իր դիրքորոշումն արտահայտել է ապրիլի 3-ին կառավարությունում կայացած ճեպազրույցի ժամանակ՝ ընդգծելով, որ կառավարությունն էլ նույն կարծիքին է։

Նախորդ օրը՝ ապրիլի 2-ին, Ադրբեջանի նախագահ Իլհամ Ալիևը մի շարք պայմաններ էր առաջադրել Հայաստանին՝ հայտարարելով․ «Հայաստանի հանդեպ Ադրբեջանի ունեցած պայմաններից առաջինը ԵԱՀԿ Մինսկի խմբի լուծարումն է, հետո՝ Հայաստանի Սահմանադրության փոփոխությունը»։ Ալիևի խոսքերով՝ «Երբ այդ երկու պահաջները կատարվեն, խաղաղության պայմանագրի կնքման համար որևէ խոչընդոտ չի մնա, ինչպես ասում ենք գնդակը Հայաստանի դաշտում է»։

«Հայաստանը պատրաստ է կնքել խաղաղության պայմանագիրը։ Որպես նախապայման այդ հնչեցված մտքերը ես չեմ դիտարկում, կարծում եմ՝ կառավարությունն էլ չի դիտարկում։ Խաղաղությունն այլընտրանք չունի, և մեր գործողությունները պետք է միտված լինեն խաղաղության վերջնական հաստատմանը։ Թե ինչ կոնցեպտով պետք է առաջ շարժվենք դեպի խաղաղության պայմանագրի կնքումը, կարծում եմ, որ շատ շուտով հանրությանը հայտնի կլինի»,- նշել է Գալյանը։

Սահմանադրության տեքստի վերաբերյալ նախարարն ավելացրել է․ «Սահմանադրության տեքստի մասով մանրամասներ ասել չեմ կարող, այդ տեքստը չի կարող գաղտնի լինել, ինչ-որ պահի հանրայնացվելու է, և յուրաքանչյուր կետ, յուրաքանչյուր նորմ քննարկվելու է հասարակության հետ»։

Լրագրողի ճշտող հարցին՝ արդյոք Հայաստանի կառավարությունը պատրա՞ստ է ընդունել Ալիևի պահանջները, նախարարը մի քանի անգամ կրկնել է․ «Կառավարությունը պատրաստ է կնքել խաղաղության պայմանագիրը»։