ՀՀ-ն շահագրգռված է Հնդկաստանից ավելի շատ պաշտպանական զենք գնելու գործարքներով. TNI

Վերջին երեք տարիներին Հնդկաստանը Հայաստանին զենք մատակարարող խոշոր երկիրների թվում է. այս մասին հայտնում է «The National Interest»-ի հոդվածի հեղինակը՝ վկայակոչելով Հնդկաստանի արտաքին գործերի նախարարության աղբյուրները։

Ըստ Aysor-ի, հեղինակը նշում է, որ Հայաստանը շահագրգռված է ավելի շատ պաշտպանական գործարքներով, այդ թվում՝ անօդաչու թռչող սարքերի (ԱԹՍ) և դրանց դեմ պայքարի համակարգերի, «երկիր-օդ» տեսակի միջին հեռահարության հրթիռների մասին նոր պայմանագրերի ստորագրմամբ:

Ըստ հեղինակի՝ մինչև 2020 թվականի պատերազմը Հնդկաստանը քիչ թե շատ հստակ դիրքորոշում ուներ՝ աջակցելով Հայաստանին Ադրբեջանի տարածքային ագրեսիայի դեմ։ Թուրքիայի և Պակիստանի աջակցությունն Ադրբեջանին ավելի էական դարձրեց Հնդկաստանի կողմից Հայաստանին աջակցելը։

2017 թվականին Թուրքիան, Ադրբեջանը և Պակիստանը ստորագրել են եռակողմ համաձայնագիր՝ պաշտպանական և ռազմավարական կապերը զարգացնելու համար: Հատկանշական է, որ Ադրբեջանը Քաշմիրի հարցում իր աջակցությունն է հայտնել Պակիստանին, իսկ Հայաստանը՝ Հնդկաստանին։ Թուրքիա-Պակիստան հարաբերությունները ձգվում են մինչև 1947 թվականը:

Բացի Թուրքիային և Պակիստանին հակակշռելուց, Հնդկաստանը նաև դիտարկում է Հայաստանին որպես հանգուցային կետ՝ ընդլայնելու իր ռազմավարական և տնտեսական կապը դեպի Հարավային Կովկաս: Այս տարածաշրջանում Դելիի ամենակարևոր շահերը կապված են կապի ռազմավարական նախագծերի վրա: Հնդկաստանի շահագրգռվածությունը INSTC-ի (Հյուսիս-Հարավ միջազգային միջանցքի) նկատմամբ, որի մաս է կազմում Հայաստանը, ամուր արմատավորված է Եվրասիայի հետ ցամաքային կապի փնտրտուքների մեջ։