Ադրբեջանական զինուժը Հադրութի և Մարտունու ուղղությամբ կիրառել է СВД և Իստիգլալ տիպի դիպուկահար հրացաններ

Դեկտեմբերի 12-ի լույս 13-ի գիշերը ղարաբաղա-ադրբեջանական հակամարտ զորքերի շփման գծում հակառակորդը տարբեր տրամաչափի հրաձգային զինատեսակներից հրադադարի պահպանման ռեժիմը խախտել է ավելի քան 60 անգամ, որի ընթացքում արձակել է շուրջ 900 կրակոց:

Առավել ինտենսիվ խախտումներ են արձանագրվել հարավային /Հադրութ/ և արևելյան /Մարտունի/ պաշտպանական ուղղություններում, որտեղ ադրբեջանական զինուժը, բացի ինքնաձիգերից և գնդացիրներից, կիրառել է նաև СВД և Իստիգլալ տիպի դիպուկահար հրացաններ /93 կրակոց/:

ՊԲ առաջապահ ստորաբաժանումները հիմնականում ձեռնպահ են մնացել հակառակորդի կողմից իրականացված անարդյունք կրակոցներին պատասխանելուց և շարունակել վստահորեն ապահովել իրենց պահպանության ներքո գտնվող մարտական դիրքերի պաշտպանությունը:

ԼՂՀ ՊՆ-ից տեղեկացնում են նաև, որ ադրբեջանական ագիտպրոպի կողմից երեկ տարածված լուրը, թե հայկական երկու անօդաչու թռչող սարք է /ԱԹՍ/ խոցվել ոչ այլ ինչ է, քան իրականությանը չհամապատասխանող շարքային քարոզչություն: