ՀՀ անդամակցությունը ԵԱՏՄ-ին տրամաբանական էր. վարչապետ
Վարչապետ Կարեն Կարապետյանը Հայաստանի՝ Եվրասիական տնտեսական միությանն անդամակցելը տրամաբանական է համարում։
«Համարում եմ ԵԱՏՄ մտնելը տրամաբանական։ Մեր տնտեսության պոտենցիալն ամենաշատը հավանականություն ունի, հնարավորությունն ունի այդ շուկայում իր տեղը գտնելու։ Ցավոք սրտի, մենք շատ ապրանք, արտադրանք, ծառայություններ չունենք, որոնք Եվրոպայում մրցունակ են, ընկալելի են, ընդունելի են», - երեկ երեկոյան լրատվամիջոցների ղեկավարների հետ հանդիպման ժամանակ ասաց վարչապետը։
Կարապետյանն ընդգծեց, որ մտնելով ԵԱՏՄ՝ Հայաստանը հնարավորություն ունի 200 միլիոնանոց շուկայում աշխատելու։
«Էֆեկտիվ կաշխատենք՝ լավ կլինի, ոչ էֆեկտիվ կաշխատենք՝ լավ չի լինի, եթե լավ չի լինի, դա չի նշանակում, որ փաստն է ԵԱՏՄ մտնելու վատը, դա նշանակում է, որ մենք էֆեկտիվ չենք եղել՝ մեկ, երկրորդը՝ ընկերություն անելով, կամ մի ակումբի անդամ լինելով՝ մենք մերժո՞ւմ ենք բոլոր մնացած հարթակներն աշխատելու, իմ կարծիքով՝ ոչ։ ԵԱՏՄ-ում անդամ լինելով մեր ձեռքը մեկը բռնե՞լ է Եվրամիություն չգնալու, չփորձելու բիզնես անելու կամ դրանով խանգարելու, իհարկե՝ ոչ։ Դուք գիտե՞ք որևէ բիզնես, որը որ Եվրամիությունում պերսպեկտիվա ունի, պոտենցիալ ունի և չի գտնվում այնտեղ, կամ իրեն չեն ընդունում այնտեղ, որովհետև ասում են՝ «չէ, քո երկիրը ԵԱՏՄ անդամ է, այդ իսկ պատճառով ես քո հետ չեմ համագործակցելու, ինվեստիցիա չեմ անելու», - ասաց վարչապետը:
«Ավելին ասեմ՝ ԵԱՏՄ-ի մեջ ակումբի անդամ լինելով Հայաստանն ունիկալ շանս ունի, բոլոր հինգ երկրները, գիտեք, սահմանափակումները, Ռուսաստանի սանկցիաները գիտեք, բիզնեսներ կան, որոնք որ Եվրոպայում այդքան էլ գոհ չեն այդ սանկցիաներից և իրենք ուզում են այդ շուկայի մեջ մնալ։ Լավագույն հարթակը, եթե մենք այդ ազդակները տանք, որպեսզի Հայաստանով մտնեն ԵԱՏՄ երկրների մեջ, իմ պատկերացմամբ, ամենամեծ հնարավորությունն ունի Հայաստանը», - ասել է նա։
Ռուսաստանը, Բելառուսը և Ղազախստանը 2014թ.-ի մայիսին Աստանայում ստորագրել են ԵՏՄ-ի մասին պայմանագիրը, որը ուժի մեջ է մտել 2015թ.-ի հունվարի 1-ից: Հունվարի 2-ին ԵՏՄ-ին անդամակցեց Հայաստանը, իսկ այնուհետեւ Ղրղզստանն անդամակցեց այս միությանը: ԵՏՄ-ի ստեղծումը նախկին Մաքսային միության անդամ-երկրների, ում ընդհանուր ՀՆԱ-ն կազմում է ԱՊՀ-ի ՀՆԱ-ի 85%-ը, ինտեգրացիան կհասցնի ավելի բարձր մակադրակի: Դրանով ավարտվում է ԱՊՀ-ի տարածքում ամենախոշոր ընդհանուր շուկայի (170 միլիոն) ձևավորումը, որը կդառնա տնտեսական զարգացման նոր հզոր կենտրոն:
Այսօրվա դրությամբ Ռուսաստանը հանդիսանում է Հայաստանի հիմնական ներդրողը, իսկ նրա կապիտալը ներկա է երկրի տնտեսության բոլոր ճյուղերում և միանգամյա բնույթ չի կրում: Մի շարք փորձագետների կարծիքով, ռուսական ներդրումների ծավալը կազմում է ավելի քան 3 միլիարդ դոլար:
