Գյուլենը չի մտահոգվում ԱՄՆ–ից արտահանձնման կապակցությամբ

Հիզմեթ շարժման գաղափարախոս Ֆեթուլլահ Գյուլենը, որին Թուրքիայի իշխանությունները մեղադրում են պետական հեղաշրջման փորձի մեջ, չի մտահոգվում ԱՄՆ–ից արտահանձնման կապակցությամբ։ Այս մասին նա ասել է Corriere della Sera–ին տված հարցազրույցում։

Նրա խոսքով՝ մինչեւ հիմա ամերիկյան իշխանությունները չեն հաստատել, որ Թուրքիայի կառավարությունից արտահանձնման մասին պաշտոնական դիմում են ստացել։ «ԱՄՆ–ը հստակ հասկացնել է տվել, որ հավատարիմ է մնալու իրավական պետության օրենքներին։ Ես չեմ վախենում եւ կհամագործակցեմ ԱՄՆ իշխանությունների հետ»,– ասել է Գյուլենը։

Նա հերթական անգամ հերքել է հեղաշրջման կազմակերպման մեղադրանքները։ «Եթե նրանք, ովքեր կարդում են իմ աշխատություններն ու լսում են իմ ճառերը, եկել են պետական հեղաշրջման գաղափարին, նրանք դավաճանել են իմ քարոզած արժեքները»,– ասել է նա։

Գյուլենի խոսքով՝ Եվրոպան կարող էր օգնել Թուրքիային շարունակել ժողովրդավարական բարեփոխումների ուղին։ «Ես միշտ պաշտպանել եմ ԵՄ–ին անդամակցելու Անկարայի քաղաքականությունը։ Կարծում եմ, որ ԵՄ անդամակցությունը միակ ուղին է Թուրքիայում ժողովրդավարական զարգացում ապահովելու համար»,– ասել է Գյուլենը։