Հայաստանում պերսոնալիզացված ավտորիտարիզմ է. Քաղաքագետ

Նիկոլ Փաշինյանի «խնդրանքները» ԲԴԽ նախագահին՝ հրաժարական ներկայացնելու և Ազգային Ժողովի պատգամավորներին պատգամավորական մանդատները վայր դնելու մասին, հակասահմանադրական ու հակաօրինական է։

ՀՀ վարչապետը գերազանցել է ՀՀ սահմանադրության 6-րդ հոդվածի 1-ին կետը, 96-րդ հոդվածը, 98-րդ հոդվածը, 152-րդ հոդվածը, 173-րդ հոդվածը, 174-րդ հոդվածը։

Նման դեպքերում, եթե խոսքը դեմոկրատական երկրի մասին է, երկրի ղեկավարին սպառնում է անխուսափելի իմպիչմենթ:

Իհարկե, Նիկոլ Փաշինյանին նման հեռանկար չի սպառնում:

Խորհրդարանական մեծամասնությունը ոչ միայն անվրդով կատարում է Փաշինյանի բոլոր ցուցումները, այլ նաև հանգիստ հետևում է, թե ինչպես է Փաշինյանը «մաքրում» իր շարքերը:

Խորհրդարանական ընդդիմությունը որևէ պոտենցիալ չունի՝ նման գործընթաց սկսելու համար և լավագույն դեպքում գնալու է այսօրվա ստատուս-քվոյի պահպանմանը:

Հայաստանում պերսոնալիզացված ավտորիտարիզմ է, որտեղ գործադիրի ղեկավարը բացահայտ նշանակում և ազատում է պատգամավորներին, վերահսկում է դատական իշխանությունը:

Փաշինյանի ցինիզմը հասել է այն վտանգավոր կետին, որ նա այդ մասին հայտարարում է բացահայտ՝ ավտորիտար ղեկավարների ոճով, ու այս ամենը տեղի է ունենում հերթական ընտրական ցիկլին ընդառաջ:

Քաղաքագետ Սուրեն Սուրենյանց