Երևանն ու Մոսկվան կիրագործեն նախկին զենքի պայմանագրերը. Փաշինյան

Հայաստանն ու Ռուսաստանը պայմանավորվածություն են ձեռք բերել վերականգնելու և ամբողջությամբ կյանքի կոչելու ռազմատեխնիկական համագործակցության ոլորտում նախկինում կնքված պայմանագրերը։

Այս մասին ապրիլի 18-ին կառավարությունում կայացած ճեպազրույցի ժամանակ հայտարարել է վարչապետ Նիկոլ Փաշինյանը։ Գործադիրի ղեկավարը փաստել է, որ երկկողմ ռազմատեխնիկական գործակցությունը, որը որոշակի ժամանակահատվածում էականորեն նվազել կամ ընդհատվել էր, այժմ վերադառնում է բնականոն հուն՝ հին պարտավորությունները կատարելու նպատակով։

Վարչապետի այս հայտարարությանը նախորդել էր ապրիլի 15-ի նրա խորհրդարանական ելույթը, որտեղ անդրադառնալով ամսվա սկզբին Մոսկվայում ՌԴ նախագահի հետ կայացած բանակցություններին՝ նա նշել էր ռազմավարական նշանակության նոր պայմանավորվածությունների ձեռքբերման մասին, որոնց արդյունքները տեսանելի կդառնան առաջիկայում։

Հիշեցնենք, որ զենքի մատակարարման հարցը տևական ժամանակ օրակարգային խնդիր էր երկկողմ հարաբերություններում: