Հովսեփյան. ավտբուսի պայթյունի վարկածների մասին հնարավոր է խոսել միայն փորձաքննությունից հետո
ՀՀ Քննչական կոմիտեի նախագահ Աղվան Հովսեփյանը հայտնել է, որ Երեւանի Հալաբյան փողոցում տեղի ունեցած ավտոբուսի պայթյունի վերաբերյալ դեռ շուտ է որեւէ բան ասել, քանի որ վարկածները մշակվելու են հետազոտությունների արդյունքների հիման վրա: Կատարվում են հետազոտություններ եւ փորձաքննություններ:
«Դուք արդեն նկատեցիք, որ քննիչների մեծ խումբ է աշխատում դեպքի վայրում, փորձագետներ: Դեպքի վայրն իրենից շատ լուրջ բան է ներկայացնում, դեպքի վայրը լուրջ է թե կազմակերպչական առումով, թե զննության, մանրամասն հետազոտում ենք այն: Դեպքի վայրի զննությամբ եւ այս պահին կատարվող հետազոտության արդյունքներով որոշում կկայացնենք: Այս պահին շուտ է որեւէ բան հայտնել, մեր անելիքները պարզ կլինեն այսօր եւ վաղը կատարվող հետազոտությունների արդյուքնում: Վարկածները կմշակվեն հետազոտությունների արդյունքների հիման վրա: Շատ եւ շատ հանգամանքներ կպարզվեն միայն մասնագետների եզրակացությամբ», - ասել նա, հայտնում է news.am-ը:
Պայթյունը տեղի է ունեցել Հալաբյան փողոցի թիվ 11 շենքի մոտ, թիվ 63 երթուղու «Բոգդան» մակնիշի ավտոբուսում։ Պայթյունն այնքան ուժգին է եղել, որ լսվել է մի քանի կիլոմետրից, հարեւան շենքերում ապակիներ են կոտրվել։ Կա 7 տուժած և 2 զոհ, րոնց ինքնությունը չի հաղորդվում։ Տուժածները, որոնք ՀՀ քաղաքացիներ են, տեղափոխվել են «Արմենիա» ՀԲԿ, որտեղ բժիշկները Էդգար Արայիկի Գասպարյանի և Ռոլանդ Սուրենի Խոջայանի առողջական վիճակը գնահատել են ծանր, Անահիտ Սարգսի Միքայելյանինը՝ բավարար, իսկ մյուսներինը` միջին ծանրության:
Հայտնի է, որ ավտոբուսն աշխատել է դիզվառելիքով, իսկ պայթյունը եղել է ալիքաձև: «Պայթյունը ոչ թե բեկարոյին է եղել, այլ ալիքաձև»,- ասել է լրագրողներին ոստիկանապետ Վլադիմիր Գասպարյանը՝ հավելելով, որ պայթել է երկրորդ շարքում նստած ուղևորի իրը։ Հնարավոր ահաբեկչության վարկածը Գասպարյանը ոչ հերքել, ոչ էլ հաստատել՝ նշելով, որ բոլոր տվյալները նախնական են, և կարող են փոխվել: Ըստ ոստիկանապետի, երթևեկության տեսախցիկները ֆիքսել են պայթյունը, դրանցից մեկն էլ վնասվել է. այժմ վերծանվում է տեսախցիկի արձանագրածը։
Հատկանշական է, որ միջադեպի վերաբերյալ հանդես է եկել հայտարարությամբ նաև ՀՀ նախագահ Սերժ Սարգսյանի մամուլի խոսնակ Վլադիմիր Հակոբյանը: Նա նշում է, որ Երևանում ուղևորատար ավտոբուսում տեղի ունեցած պայթյունի վայրում իրականացվում են փրկարարական և քննչական աշխատանքներ: Սարգսյանին պարբերաբար զեկուցվում է աշխատանքների ընթացքի վերաբերյալ: Սարգսյանը ՀՀ ոստիկանությանը հանձնարարել է ուժեղացնել պարեկապահակային ծառայությունը:
Գլխավոր դատախազի խորհրդական Քրիստինե Մելքոնյանի հաղորդմամբ՝ քրգործ է հարուցվել ՔՕ 279-րդ հոդվածի 3-րդ մասի հատկանիշներով՝ սպառողների կյանքին սպառնացող ծառայություն,որը հանգեցրել է երկու կամ ավելի զոհերի:
