Քրեական աշխարհը, վստահեցնում եմ, որ վերահսկելի է ոստիկանության կողմից. ոստիկանապետ

Հայաստանն այսօր ամենաանվտանգ երկրներից մեկն է աշխարհում: Այս մասին, այսօր լրագրողների հետ զրույցում ասաց ՀՀ ոստիկանապետ Վալերի Օսիպյանը:

«Եթե համեմատենք այս տարվա առաջին կիսամյակը 2018-ի հետ, ունենք մինուս 1, եթե անգամ հանենք նաեւ 2018-ից 2019-ին փոխանցված սպանությունները, ապա անգամ կարող ենք ունենալ մինուս 2-3 սպանություն»,- ասաց Օսիպյանը:

Անդրադառնալով օրեր առաջ Նոր Նորքում «օրենքով գող» Անդրանիկ Հարությունյանի՝ Անդիկի սպանությանը, Օսիպյանն ասաց. «Այդ գործի հետ կապված իրականացվում են բոլոր օպերատիվ համալիր միջոցառումները՝ համագործակցելով այլ ստորաբաժանումների հետ: Ավելին չեմ ցանկանա ասել՝ ելնելով գործի շահերից: Ես այս պահին ոչինչ չեմ ասի, քանի որ կխանգարեմ գործի քննությանը»:

Դիտարկմանը, թե այդ սպանությունից հետո քրեական աշխարհում իրարանցում է, ոստիկանապետն արձագանքեց. «Քրեական աշխարհը, հանցավոր աշխարհը, վստահեցնում եմ, որ վերահսկելի է ոստիկանության կողմից: Որեւէ խնդիր չեմ տեսնում»:

Հարցին՝ Լյուսի Քոչարյան անունով ֆեյսբուքյան օգտատերը մի քանի օր առաջ բարձրաձայնել է Հայաստանում ընտանեկան բռնության դեպքերի մասին, մտահոգի՞չ են այդ թվերը, Օսիպյանը պատասխանեց. «Մտահոգիչ է այնքանով, որ լինում են այդպիսի բաներ, որը հարիր չէ հայերիս եւ հայ ավանդական ընտանիքներին: Բայց ընդհանուր առմամբ այդ կարգի մտահոգություն ինձ համար չի առաջացնում»: