ՔՊ-ն մերժեց քաղբանտարկյալների վերաբերյալ ընդդիմության հայտարարության նախագիծը

«Քաղաքացիական պայմանագիր» խմբակցությունը 52 դեմ, 21 կողմ ձայներով մերժեց «Հայաստան» խմբակցության ներկայացրած «ՀՀ-ում առկա քաղբանտարկյալների և նրանց խախտված իրավունքների վերականգնման մասին» հայտարարության նախագիծը ԱԺ նստաշրջանի օրակարգ ներառելու առաջարկը:

Ավելի վաղ ԱԺ պետաիրավական հարցերի մշտական հանձնաժողովը, իշխող ուժի ձայներով, բացասական եզրակացություն էր տվել ընդդիմության նախագծին:

Քննարկումների ընթացքում «Հայաստան» խմբակցության պատգամավոր Էլինար Վարդանյանը հայտարարել էր, որ Հայաստանում կան անձինք, ովքեր լիովին համապատասխանում են ԵԽԽՎ 2012 թվականի թիվ 1900 բանաձևով սահմանված «քաղբանտարկյալ» հասկացության չափանիշներին: