Իրականում «կառավարությունը ես եմ» արտահայտությունը բավականին համեստ է

Գործնականում, Նիկոլ Փաշինյանն իհարկե շատ համեստություն է արել, ասելով, թե՝ «կառավարությունը ես եմ»: «Իրական Հայաստանում» Նիկոլ Փաշինյանը ոչ միայն ինքն է կառավարությունը, այլ ինքն է նաեւ Ազգային Ժողովը, օրինակ:

Չէ՞ որ Ազգային Ժողովի նախագահը հայտարարել է, որ Նիկոլ Փաշինյանն իր ղեկավարն է, եւ ոչ ոք չի ասել, որ Նիկոլ Փաշինյանը պաշտոնյա է, որին նշանակում է Ազգային Ժողովը, ինչպես կարող է նա լինել ԱԺ նախագահի ղեկավար:

Բայց, գիտենք, որ հենց այդպես էլ կա: Եվ Նիկոլ Փաշինյանին ղեկավար են ճանաչում ԱԺ ամբողջ մեծամասնությունը, առնվազն հրապարակավ, այստեղ չկա որեւէ կասկած, օրինակներն ու վկայությունները բազմաթիվ են:

Որովհետեւ, Հայաստանում ներկայումս կառավարման մոդելը կուսակցապետությունն է: Այլ կերպ ասած, գործում է կուսակցական, ոչ թե պետական սահմանադրական հիերարխիա:

Այնպես որ, «կառավարությունը ես եմ» արտահայտությունը բավականին համեստ է:

Վերլուծաբան Հակոբ Բադալյան