Արցախցիները բացատրություն են պահանջել Վիտալի Բալասանյանից․ ՄԱՄՈՒԼ

VERELQ-ը ներկայացնում է հայաստանյան մամուլի ամենաուշագրավ հրապարակումները:

«Հրապարակը» գրում է․

«Հրապարակ» թերթը գրում է. «Շաբաթ օրը Ազատության հրապարակում արցախցիների հրավիրած հանրահավաքի վերջում «բոլոլա» է եղել: Հանրահավաքին եկած Արցախի քաղաքական, հասարակական մի խումբ գործիչներ վերջում հրապարակի մատույցներում նկատել են ԱՀ նախկին ԱԽՔ Վիտալի Բալասանյանին ու պարզաբանումներ պահանջել, թե ինչ էիր բանակցում ադրբեջանցիների հետ, որ վերջում Արցախն ընկավ:

Հիշեցնենք, որ 44-օրյա պատերազմից հետո Բալասանյանը, որ ջերմ հարաբերություններ ուներ ռուս խաղաղապահների հրամանատարության հետ, ներգրավված էր ադրբեջանցիների հետ բանակցություններում։ Արցախցիները Վիտոյին մեղադրել են նաեւ պատերազմից երկու տարի անց Փառուխը հանձնելու մեջ։ Բալասանյանն ասել է, որ ինքը կապ չունի, նրանց մեղադրանքների հասցեատերը չէ, Փառուխն էլ չէր կարող հանձնել, քանի որ ինքը եղել է Անվտանգության խորհրդի քարտուղար եւ չէր կարող զորքի հետքաշման հրաման տալ, այդ հրամանը տվել է ՊԲ հրամանատար Կամո Վարդանյանը, եւ նրանց ուղղորդել է Վարդանյանի կողմը:

Ներկաները տպավորություն են ստացել, որ Վարդանյանը ՀՀ իշխանությունների հետ ջերմ հարաբերությունների շնորհիվ է, որ այս կորուստների համար պատասխանատվության չի կանչվում»։

«Ժողովուրդ» օրաթերթը գրում է.

««Ժողովուրդ» օրաթերթի իրազեկ աղբյուրները փոխանցում են, որ ՀՀ ներքին գործերի նախարար Արփինե Սարգսյանը երեխայի է սպասում:

Տեղեկացնենք, որ նա երկար տարիներ ամուսնացած է, բայց նոր պետք է ծնվի նրա առաջնեկը: «Ժողովուրդ» օրաթերթը տեղեկացավ նաեւ, որ Արփինե Սարգսյանին համակարգում սկսել են խնայել, շատ չբարկացնել, քանի որ այնպիսի վիճակում է, որ պետք է ոչ միայն նախարարի, այլեւ նրա ծնվելիք բալիկի առողջության մասին մտածել: Եվ սա բավականին արտասովոր վիճակ է համակարգի համար: Բավական չէ, որ կին է ղեկավարում ուժային կառույցը, որը անսովոր էր համակարգի համար, հիմա էլ մայրիկ է դառնում, պետք է խնայել նրան:

«Ժողովուրդ» օրաթերթը տեղեկացավ նաեւ, որ մայրական արձակուրդով պայմանավորված՝ ամիսներ անց Արփինե Սարգսյանը չի հաճախելու աշխատանքի: Սա նշանակում է, որ Նիկոլ Փաշինյանը պետք է Արփինե Սարգսյանին փոխարինող փնտրի»։