Զարուհի Փոստանջյանը լքեց «Ժառանգություն» կուսակցությունը

ԱԺ «Ժառանգություն» խմբակցության անդամ Զարուհի Փոստանջյանը դադարեցնում է անդամակցությունը «Ժառանգություն» կուսակցությանը։ Այս մասին պատգամավորը տեղեկացրել է Facebook-յան իր էջում։

Փոստանջյանը նշել է, որ ակնհայտ փաստ է «Ժառանգություն» կուսակցության սկզբունքային, գաղափարական և ծրագրային խզումը իր հռչակած և անցած քաղաքական ուղու հետ, ինչը հանգեցրել է հրաժարման կուսակցության կողմից ընդունված սկզբունքներից, գաղափարախոսությունից և ծրագրից: Քաղաքական գործունեություն իրականացնելու համար վերը նշված փաստը դարձրել է անհամատեղելի իր անդամակցությունը «Ժառանգություն» կուսակցությանը:

«Հայտնում եմ ձեզ, որ դադարեցնում եմ իմ անդամակցությունը «Ժառանգություն» կուսակցությանը: Միևնույն ժամանակ` բարձր եմ գնահատում շուրջ տասնամյա համատեղ աշխատանքը և միասին անցած ճանապարհը»,- գրել է Փոստանջյանը։

Հիշեցնենք, Փոստանջյանը առաջիկա խորհրդարանական ընտրություններին չի մասնակցի՝ նրա անունը որևէ քաղաքական ուժի կամ դաշինքի ցուցակներում ներառված չէ: Ինչ վերաբերում է «Ժառանգություն» կուսակցությանը, ապա Արմեն Մարտիրոսյանն ու Րաֆֆի Հովհաննիսյանը ընտրություններին կմասնակցեն «Օհանյան - Րաֆֆի - Օսկանյան» դաշինքով: