Սեյրան Օհանյանն ասել է, որ ինքն "իշխանական նախագիծ" չէ

146
Պաշտպանության նախկին նախարար, ապագա խորհրդարանական ընտրություններին մանակցության հայտ ներկայացրած եւ հանրության հետ հիմնականում վերջերս ստեղծված Facebook-ի իր էջի միջոցով շփող Սեյրան Օհանյանը պատասխանել իմ էլեկտրոնային փոստին ուղարկված և որոշ լրատվամիջոցների կողմից առավել հաճախ շրջանառվող հարցերին:

Պատախսանները հիմնականում վերաբերում են իր ապագա ընդդիմադիր քաղաքական գործունեության վերավերյալ հնչող կասկածներին, ղարաբաղյան հակամարտության կարգավորման յուր տեսլականին եւ ապրիլյան պատերազմական գործողություններին: Ընդհանրապես այս հարցում Օհանյանն կարծես ընտրել է ՀՀ ԱԳ նախկին նախարար Վարդան Օսկանյանի ռազմավարությունը: Նա 2008 թ.-ի պաշտոնաթողությունից հետո բավականին երկար ժամանակ վերցրեց պաուզա, այնուհետեւ երբ հայտարարեց իր քաղաքական գործունեության սկզբի մասին, սկսեց հանդես գալ Facebook սոցցանցի տարածքում: Ուղղակի Օհանյանի պարագայում լռությունը երկար չտեւեց, ինչը թերեւս այն հանգամանքով էր պայմանավորված, որ խորհրդարանական ընտրությունները սարերի հետեւում չեն:

Քաղաքական գործունեություն

"Բոլոր հարցադրումներում կարմիր գծով անցնում է այս միտքը. "Արդյոք ես համարվո՞ւմ եմ իշխանական նախագիծ": Այս հարցին իր պատասխան Օհանյանը սպային վայել բարձր պատասխանատվությամբ վստահեցնում և պատասխանում է՝ ՈՉ:

"Ուղղորդո՞ւմ են արդյոք ինձ ՀՀ առաջին, երկրորդ և գործող նախագահները: Ես՝ Սեյրան Օհանյանս, կրկնում եմ՝ քաղաքական հայտ ներկայացնելու որոշումը կայացրել եմ ինքնուրույն՝ ելնելով երկրում ստեղծված ներքաղաքական, տնտեսական, բարոյական ճգնաժամից: Վստահեցնում եմ ինձ հետ թիմ կազմող հայրենանվեր մարդկանց, քաղաքական գործիչներին, մարտական և զինակից ընկերներին, ովքեր քաղաքական պայքարում կանգնելու են իմ կողքին, որ մենք լինելու ենք ժողովրդի հետ՝ հանուն ազգային գաղափարների, նրա անվտանգության և խաղաղ արարումի", - նշում է նախկին նախարարը:

Իր գործունեության ընթացքում զբաղեցնելով կարևորագույն պաշտոններ պետության բոլոր նախագահների օրոք՝ Օհանյանը նշում է, որ ծառայել է ոչ թե անձերին, այլ Հայաստանի Հանրապետությանը, ուստի անընդունելի չի համարում «պրիմիտիվ» շահարկումները:

Ղարաբաղյան հակամարտություն

"Ես առաջնահերթորեն անդրադարձել եմ Ղարաբաղյան հակամարտությանը, որովհետև իմ՝ քաղաքականության մեջ հայտ ներկայացնելուց հետո Հայաստանից, Արցախից և սփյուռքից ինձ դիմող քաղաքական, զինվորական, գործիչների, հասարակական տարբեր շերտերի, տեղական և միջազգային լրատվամիջոցների կողմից հնչող համար մեկ հարցը եղել է իմ դիրքորոշումը Ղարաբաղյան հակամարտության վերաբերյալ: Ես՝ որպես ռազմական, այսուհետ նաև քաղաքական գործիչ, հրապարակային հայտնել եմ իմ տեսակետը՝ մեր ժողովրդի, պետության համար անկյունաքար հանդիսացող Ղարաբաղյան հակամարտության վերաբերյալ:

Ես նորից եմ պնդում, որ Ղարաբաղյան հիմնահարցի շուտափույթ և ոչ բարենպաստ լուծումը՝ անիմաստ զիջումների գնով, հարված է մեր պետականությանը: Պնդում եմ, որ Լեռնային Ղարաբաղի ժողովուրդը, համառ և արյունոտ պայքարի ընթացքում ձեռք բերելով իր անկախությունը, ձևավորել է պետություն, որը կոչվում է Արցախ, որն ունի իր Սահմանադրությունը, անվտանգությունն ապահովող զինված ուժերը, զարգացնում է պետական ինստիտուտները, տնտեսությունը և որպես պետություն փորձում է հայտ ներկայացնել աշխարհում հակամարտությունների արդյունքում իրենց անկախությունը նվաճած պետությունների կողքին: Չկարգավորված հակամարտության պայմաններում արցախցին զարգացրել է իր տնտեսությունը՝ արձանագրելով տնտեսական աճ, ավելացրել է բնակչության թիվը: Եվ այսօր պաշտպանության բանակը՝ իբրև բնակչության անվտանգության երաշխավոր, վստահորեն վերահսկում է սահմանագիծը: Ռազմական առումով՝ 2014 թ.-ի հունվարից Ադրբեջանը նոր մարտավարություն սկսեց՝ մեծացնելով լարվածությունը շփման գծում, բայց արցախցին դարձյալ պայքարեց, ապրեց ու արարեց, իսկ ջահել հարսները շարունակեցին որդիներ ծնել:

Հասկանալով ՀՀ բոլոր ղեկավարների՝ խաղաղության պահպանմանը միտված մոտեցումները՝ անընդունելի եմ համարում խոսել փոխզիջումների մասին՝ առանց Արցախի պետականությունը և ժողովրդի անվտանգությունն ապահովող բանաձևերի ընդունման: Բարձր եմ գնահատում բոլոր միջազգային կառույցների և առաջին հերթին ՌԴ-ի շահագրգռվածությունը և զսպող առաքելությունը խնդրի խաղաղ կարգավորման գործընթացում", - նշում է Սեյրան Օհանյանը:

Ապրիլյան պատերազմ

"Մեր հերոս ժողովուրդը, պաշտպանության բանակը, ողջ հրամանատարական կազմը արիաբար հետ են շպրտել հակառակորդին և պաշտպանել հայրենի հողը: Ապրիլյան պատերազմին ռազմական գնահատականներ տալու իրավունք ունեն ռազմական բոլոր այն գործիչները, որոնք տեղյակ են առաջնագծի, նրա առանձնահատկությունների, սպառազինության և բանակի իրական խնդիրներին: Որպես ռազմական գործիչ՝ ես չեմ խուսափում պատասխանել հարցերին, որոնք չեն պարունակում գաղտնիություն և ենթակա են հրապարակային քննարկման: Հաղթանակը տարել են զինվորն ու հրամանատարը, և չի կարելի քաղաքական առևտրի նյութ դարձնել առաջնագծում զոհված տղաների արյունը:

Համոզված եմ, որ այս հարցը մամուլում շահարկելն ունի հասարակության ուշադրությունը քաղաքական գործընթացներից շեղելու և իմ անձի շուրջ բացասական դաշտ ձևավորելու դիտավորություն:

Պետության անվտանգության խնդրի լուծմանը նպաստում են իրավիճակի ճշմարիտ և ազնիվ վերլուծությունները, իսկ «քաղաքագետը», որ իրեն հայտարարություններով հանդես գալու իրավունք է վերապահում, պետք է ինձ նախ հավաստիացնի, որ երբևիցե զինվորի հետ մարտական հերթապահություն է իրականացրել առաջնագծի որևէ խրամատում: Հարգելի՛ քաղաքական մեկնաբաններ, հորդորում եմ զերծ մնալ անիմաստ և պետության անվտանգությանը վնասող հայտարարություններից", - եզրափակել է Օհանյանը՝ խոստանալով "մշտապես անկեղծ և հրապարակայնորեն պատասխանել ինձ ուղղված հարցերին":

Տպել

Թեմայի այլ նորություններ
Загрузка...