Հոկտեմբերի 6-ին Պրահայում Էրդողանը կհանդիպի Փաշինյանի հետ

Թուրքիայի նախագահ Ռեջեպ Էրդողանը հոկտեմբերի 6-ին Պրահայում կհանդիպի Հայաստանի վարչապետ Նիկոլ Փաշինյանի հետ՝ Եվրոպական քաղաքական համայնքի գագաթնաժողովի շրջանակներում։ Այս մասին երեքշաբթի հայտնել է Sabah թերթը՝ վկայակոչելով իր աղբյուրները։

Բանակցություններում, նշում է թերթը, նախատեսվում է քննարկել Թուրքիայի և Հայաստանի միջև հարաբերությունների կարգավորման հարցը։

Մասնավորապես, սպասվում է, որ Էրդողանը Փաշինյանին կառաջարկի երկկողմ հարաբերությունների կարգավորման հարցով հատուկ ներկայացուցիչների հանդիպումներն անցկացնել և՛ Թուրքիայում, և՛ Հայաստանում, այլ ոչ թե երրորդ երկրների տարածքում։

Բացի այդ, Թուրքիայի ղեկավարը առաջարկներ կներկայացնի տարածաշրջանում լարվածությունը թուլացնելու և Հայաստանի ու Ադրբեջանի միջև որքան հնարավոր է շուտ խաղաղության պայմանագիր ստորագրելու վերաբերյալ։