ԱՄՆ-ում ՀՀ դեսպանը հանդիպել է հասարակական, բիզնես և դիվանագիտական շրջանակների հետ

Ամերիկյան մայրաքաղաքի ամենասպասված իրադարձություններից մեկի՝ Մերիդիան միջազգային կենտրոնի գլխավոր հանդիսությանն ընդառաջ, ԱՄՆ-ում Հայաստանի դեսպանությունում տեղի է ունեցել պաշտոնական ընդունելություն՝ համախմբելով դիվանագիտական և գործարար էլիտայի ներկայացուցիչներին:

Դեսպան Նարեկ Մկրտչյանի կողմից կազմակերպված պաշտոնական ընթրիքը դարձել է ոչ ֆորմալ երկխոսության և կապերի ամրապնդման հարթակ։ Ինչպես հաղորդում են դիվանագիտական ներկայացուցչությունից, միջոցառմանը ներկա են գտնվել Վաշինգտոնի հասարակական, բիզնես և դիվանագիտական շրջանակների ազդեցիկ դեմքեր, ովքեր նաև հրավիրված էին Մերիդիանի գլխավոր միջոցառմանը:

«Այս հանդիպումը բացառիկ հնարավորություն ընձեռեց հանգամանալից մտքեր փոխանակելու Հայաստանի և Միացյալ Նահանգների միջև փոխշահավետ համագործակցության, ինչպես նաև հայ-ամերիկյան հարաբերությունների դինամիկ զարգացումների շուրջ», — նշված է ՀՀ դեսպանության տարածած պաշտոնական հաղորդագրության մեջ:

Ավարտելով երկկողմ օրակարգի շուրջ քննարկումները դեսպանության հարկի տակ՝ բարձրաստիճան հյուրերն ուղևորվել են Մերիդիան միջազգային կենտրոն՝ մասնակցելու երեկոյի գլխավոր հանդիսավոր արարողությանը: