Թաղման նպաստները չեն կրճատվի. նախարարությունը հետ է կանչում նախագիծը

Հայաստանի կառավարությունը հետ է կանչում թաղման նպաստ ստացողների շրջանակը կրճատելու վերաբերյալ աղմկահարույց օրինագիծը: Հանրային բուռն արձագանքներից և իշխող խմբակցության հետ քննարկումներից հետո Աշխատանքի և բարեկեցության նախարարությունը որոշել է պահպանել վճարումների գործող համակարգը։

Նախաձեռնությունը կասեցնելու որոշման մասին Ֆեյսբուքյան տեսաուղերձով հայտարարել է ոլորտի նախարար Արսեն Թորոսյանը՝ ընդգծելով, որ հանրային քննարկման ներկայացված նախագիծն Ազգային ժողով չի ուղարկվի։ «Որոշում ենք կայացրել այդ մասով մեր նախաձեռնությունը առաջ չտանել, այսինքն որևէ փոփոխություն չիրականացնել»,- նշել է գերատեսչության ղեկավարը։

Բարեփոխումից հրաժարվելը հանրային կարծիքի մշտադիտարկման և նախորդ շաբաթ խորհրդարանական «Քաղաքացիական պայմանագիր» խմբակցության պատգամավորների հետ ունեցած խորհրդակցությունների արդյունքն է: Նախարարը վստահեցրել է բնակչությանը, որ ֆինանսական աջակցությունը կտրամադրվի նախկին ծավալով. «Այն բոլոր քաղաքացիները, որոնք որ այսօրվա կարգավորումներով ստանային այդ նպաստը կշարունակեն ստանալ»։

Հիշեցնենք, որ ավելի վաղ նախարարությունը նախատեսում էր 2027 թվականի հունվարի 1-ից էապես նեղացնել շահառուների շրջանակը՝ 200 հազար դրամ ստանալու իրավունքը վերապահելով միայն անապահովության համակարգում ընդգրկված ընտանիքներին։

Ենթադրվում էր, որ շուրջ 4,4 միլիարդ դրամ կազմող տարեկան ֆոնդը կուղղվեր նվազագույն կենսաթոշակների բարձրացմանը՝ 46 հազարից հասցնելով 47 հազար դրամի։ Դեռևս նոյեմբերի սկզբին Արսեն Թորոսյանն ակտիվորեն պաշտպանում էր նախագիծը՝ այն որակելով որպես սոցիալական աջակցության հասցեականության բարձրացման քայլ, սակայն հնարավոր սոցիալական հետևանքների վերաբերյալ քննադատություններն ու մտահոգությունները ստիպեցին իշխանություններին վերանայել իրենց ծրագրերը։