Կարապետյան․ Տիգրանաշենի հարցում զիջումները դիվանագիտություն չեն

«Ուժեղ Հայաստան» խմբակցության ղեկավար Նարեկ Կարապետյանը վարչապետ Նիկոլ Փաշինյանի՝ Տիգրանաշենի վերաբերյալ հայտարարությունները որակել է որպես պատերազմի սպառնալիքի ներքո Ադրբեջանի պահանջներին զիջելու քաղաքականություն։

Ֆեյսբուքյան տեսաուղերձում նա նշել է, որ Փաշինյանի տրամաբանությամբ Բաքվի պահանջներին չհամաձայնելը ներկայացվում է որպես պատերազմի վտանգ ստեղծող քայլ։

Կարապետյանի խոսքով՝ նույն մոտեցումը դրսևորվում է նաև Սահմանադրության, Անկախության հռչակագրի և Տիգրանաշենի հարցերում։

«Սահմանադրություն փոխեք, թե չէ պատերազմ կլինի, Անկախության հռչակագիրը հանեք, թե չէ պատերազմ կլինի, Տիգրանաշենը տվեք, թե չէ պատերազմ կլինի։ Մինչև ո՞ւր», - ասել է նա։

Պատգամավորի համոզմամբ՝ Տիգրանաշենի հարցում Հայաստանը պետք է ոչ թե միակողմանի զիջումների գնա, այլ բանակցությունների միջոցով հասնի նրան, որ բնակավայրը մնա Հայաստանի տարածքում։

Նա ընդգծել է նաև Տիգրանաշենով անցնող ճանապարհի ռազմավարական նշանակությունը՝ հիշեցնելով, որ այն Հայաստանի արտաքին առևտրի կարևոր երթուղիներից է, որով տարեկան շուրջ 2 մլն տոննա բեռ է տեղափոխվում։

«Ամեն անգամ չի կարելի ասել՝ սա չանեք՝ պատերազմ կլինի, նա չանեք՝ պատերազմ կլինի։ Այդպես դիվանագիտություն չեն վարում», - եզրափակել է Կարապետյանը։