«Որտեղ չի հասնում Ալիևը, օգնում է Փաշինյանը». ընդդիմությունը՝ Քոչարյանի մասին

Հայաստանի երկրորդ նախագահ Ռոբերտ Քոչարյանի կալանավորումը քաղաքականապես մոտիվացված քայլ է, որի նպատակն է չեզոքացնել իշխանության գլխավոր ընդդիմախոսին՝ Ադրբեջանին տարածքային և սահմանադրական նոր զիջումների գնալուց, ինչպես նաև Ռուսաստանից դեպի Թուրքիա աշխարհաքաղաքական շրջադարձ կատարելուց առաջ:

Այս մասին հայտարարել է հայաստանյան ընդդիմությունը՝ մեկնաբանելով քաղաքական գործչի դեմ իրականացվող քրեական հետապնդումը նրա ծննդյան օրը։

Օգոստոսի 31-ին կայացած մամուլի ասուլիսի ժամանակ ընդդիմադիր «Հայաստան» խմբակցության ղեկավար Աննա Գրիգորյանն ուղիղ զուգահեռներ է անցկացրել Ադրբեջանում պահվող Արցախի նախկին ղեկավարների ճակատագրի և Երևանում՝ Ազգային անվտանգության ծառայության մեկուսարանում Ռոբերտ Քոչարյանի գտնվելու միջև: «Այնտեղ, որտեղ չի հասնում Ալիևի ձեռքը, օգնության է գալիս Նիկոլ Փաշինյանը», - ընդգծել է պատգամավորը՝ հավելելով, որ այս քրեական գործը բացառապես քաղաքական և աշխարհաքաղաքական բնույթ է կրում։

Ըստ Գրիգորյանի՝ հետընտրական շրջանում առանցքային ընդդիմադիր առաջնորդի մեկուսացումը պատահական չէ: Իշխանությունները ձգտում են մաքրել քաղաքական դաշտը այն «լրջագույն փորձություններից» առաջ, որոնք սպասվում են երկրին։

Բաքվին նախապատրաստվող զիջումների թվում ընդդիմության ներկայացուցիչը մատնանշել է Տիգրանաշենի (որը ՀՀ վարչապետն անվանում է Քյարքի) հնարավոր հանձնումը, ինչպես նաև Հայաստանի Սահմանադրության փոփոխությունը՝ Անկախության հռչակագրին արվող հղումների հեռացմամբ, ինչն ադրբեջանական կողմի ուղիղ պահանջն է։

Իր ելույթում պատգամավորն առանձնահատուկ ուշադրություն է հրավիրել գործող կառավարության արտաքին քաղաքական վեկտորի վրա։ Ինչպես նշել է Գրիգորյանը, երկրի ղեկավարությունը փորձում է Հայաստանը տանել «թուրքական ենթակայության» տակ, ինչի համար նպատակաուղղված թշնամանք է հրահրում Ռուսաստանի հետ հարաբերություններում։

Այս համատեքստում Քոչարյանի կալանավորումը, ով մշտապես հանդես է գալիս Մոսկվայի հետ բարիդրացիական կապերի պահպանման օգտին, ընդդիմությունը գնահատում է որպես ռացիոնալ ձայները լռեցնելու փորձ, որոնք դեմ են Երևանի ներկայիս աշխարհաքաղաքական կուրսին։