ԵՄ-Հայաստան համագործակցությունը կկառուցվի 4 առանցքային ուղղությունների շուրջ

Եվրահանձնաժողովի նախագահ Ուրսուլա ֆոն դեր Լայենը հայտարարել է, որ Երևանում ընթացող ԵՄ-Հայաստան գագաթնաժողովը պետք է կողմերի հարաբերությունները դուրս բերի նոր մակարդակի և խորացնի գործընկերությունը:

Նրա խոսքով՝ համագործակցությունը կկառուցվի չորս առանցքային ուղղությունների շուրջ։ Առաջին հերթին խոսքը կապակցվածության զարգացման մասին է՝ տրանսպորտի, էներգետիկայի և թվային ոլորտի։ Եվրոպական միությունը Հայաստանը դիտարկում է որպես պոտենցիալ տարածաշրջանային տրանսպորտային հանգույց, սատարում է «Խաղաղության խաչմերուկ» նախաձեռնությունը և պատրաստ է մասնակցել ենթակառուցվածքային նախագծերին, այդ թվում՝ սահմանային անցակետերի վերականգնմանը և տրանսպորտային միջանցքների զարգացմանը։

Առանձնակի շեշտադրում է արվել էներգետիկայի վրա. ԵՄ-ն մտադիր է աջակցել վերականգնվող աղբյուրների ոլորտի նախագծերին և երկրի էներգահամակարգի ամրապնդմանը։ Նշվել է նաև Հայաստանի տեխնոլոգիական հատվածի աճը, մասնավորապես՝ արհեստական բանականության բնագավառում, և եվրոպական ընկերությունների պատրաստակամությունը՝ ներդրումներ կատարելու այս շուկայում։

Որպես երկրորդ ուղղություն նշվել է անվտանգության ոլորտում համագործակցությունը, ներառյալ զինված ուժերին աջակցությունը և հիբրիդային սպառնալիքների ու ապատեղեկատվության դեմ պայքարը։

Երրորդը մուտքի արտոնագրերի քաղաքականության զարգացումն է. ԵՄ-ում հայտնում են զգալի առաջընթացի մասին՝ մուտքի արտոնագրերի ազատականացման ճանապարհին և այս գործընթացը մինչև վերջ հասցնելու մտադրության մասին։

Չորրորդ առաջնահերթությունը մնում է տնտեսական աջակցությունը։ Խոսքը 270 միլիոն եվրո արժողությամբ ծրագրի մասին է, որն արդեն իրականացվում է և, ինչպես ակնկալվում է, թույլ կտա ներգրավել մինչև 2,5 միլիարդ եվրոյի ներդրումներ։ Միջոցներն ուղղվում են բիզնեսի զարգացմանը, աշխատատեղերի ստեղծմանը, ականազերծմանը և Լեռնային Ղարաբաղից տեղահանվածներին օգնություն ցուցաբերելուն։