ԱԺ-ում կողմ են ֆիզկուլտուրայի և սպորտի բնագավառում համագործակցության համաձայնագրին

««Անկախ պետությունների համագործակցության մասնակից պետությունների՝ ֆիզիկական կուլտուրայի եւ սպորտի բնագավառում համագործակցության մասին» 2007 թվականի մայիսի 12-ի համաձայնագրում փոփոխություններ եւ լրացումներ կատարելու մասին» արձանագրությունն ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի՝ նոյեմբերի 25-ի նիստում քննարկման է ներկայացրել ՀՀ կրթության, գիտության, մշակույթի եւ սպորտի նախարարի տեղակալ Արթուր Մարտիրոսյանը:

Զեկուցողը նշել է, որ 2007 թվականին Հայաստանը, ի թիվս ԱՊՀ մասնակից այլ պետությունների, ստորագրել է ֆիզիկական կուլտուրայի եւ սպորտի բնագավառում համագործակցության մասին համաձայնագիր, որն այդուհետ արձանագրությամբ ենթարկվել է որոշակի փոփոխությունների: Փաստաթուղթը փոփոխություններով վավերացրել են մի շարք երկրներ, ուստի Հայաստանին եւս առաջարկվում է հաստատել արձանագրությունը՝ կից կանոնադրությամբ:

Արթուր Մարտիրոսյանը տեղեկացրել է, որ հիմնական փոփոխությունները կատարվել են կանոնադրության 1-ին եւ 4-րդ բաժիններում, ինչպես նաեւ ավելացվել է նոր՝ 5-րդ բաժինը: Փոփոխություններն ուղղված են համաձայնագրի իրավաբանական ձեւակերպումներին, խորհրդի գործառույթների հստակեցմանը, կառուցակարգի բարելավմանը: Հստակեցվել են նաեւ քարտուղարության դերին եւ լիազորություններին վերաբերող դրույթները, սահմանվել է խորհրդի նիստերի կազմակերպման եւ ֆինանսավորման կարգը:

Արձանագրությունը ստորագրել են Հայաստանը, Բելառուսը, Ղազախստանը, Ղրղզստանը, Ռուսաստանի Դաշնությունն ու Տաջիկստանը:

Զեկուցողը պատասխանել է հանձնաժողովի անդամների հարցերին:

Հարակից զեկուցող Ջուլիետա Ազարյանն առաջարկել է կողմ քվեարկել օրենքի նախագծին:

Հանձնաժողովը դրական եզրակացություն է տվել նախաձեռնությանը: Առաջարկվել է այն ընդգրկել ԱԺ առաջիկա հերթական նիստերի օրակարգի նախագծում: