Հայաստանը կստանա ԵՄ վիզաների ծրագիրը, իսկ 2026-ին՝ կենսաչափական անձնագրեր

Առաջիկա օրերին Եվրամիությունը Հայաստանին պաշտոնապես կհանձնի վիզաների ազատականացման գործողությունների ծրագիրը։ Զուգահեռաբար, 2026 թվականի երկրորդ կեսից երկիրը կսկսի նոր նմուշի կենսաչափական անձնագրերի և նույնականացման քարտերի արտադրություն։ Այս մասին «2026-ի պետական բյուջեի» նախագծի քննարկմանն ասել է ՆԳ նախարար Արփինե Սարգսյանը։

Նախարարի խոսքով, ծրագրի ստացումը կհստակեցնի այն բարեփոխումների ուղղությունները, որոնք կառավարությունն արդեն իսկ թիրախավորել է միգրացիայի և քաղաքացիության ոլորտում։ Սա կոնկրետություն կմտցնի պետական մարմինների կողմից իրականացվելիք միջոցառումների մեջ։ Հիշեցնենք, որ ԵՄ-ի հետ վիզաների ազատականացման շուրջ երկխոսությունը մեկնարկել էր 2024 թվականի սեպտեմբերին։

Անդրադառնալով կենսաչափական փաստաթղթերի ներդրմանը՝ Սարգսյանը փաստեց, որ աշխատանքներն ընթացքի մեջ են։ Մասնավոր գործընկերոջ հետ կնքված պայմանագիր կա, որոշարկվել են տարածքային գրասենյակների մանրամասները։ Արդեն հաստատվել է կենսաչափական նույնականացման քարտի արտաքին տեսքը, իսկ առաջիկայում կհաստատվի նաև անձնագրի նկարագիրը։

Նախարարը պարզաբանեց, որ ծառայության շենքային պայմանները կվերանայվեն, իսկ շինարարական աշխատանքները նախատեսվում է իրականացնել 2026-ի առաջին կիսամյակում։ Սա թույլ կտա նույն թվականի երկրորդ կեսից մեկնարկել փաստաթղթերի արտադրությունը։ Նա վստահեցրեց, որ անցումային փուլի պայմանները մանրամասն քննարկվել են՝ սահուն գործընթաց և կառավարելի հերթեր ապահովելու համար։ Ոլորտի բարեփոխումների շրջանակում Սարգսյանը կարևորեց նաև «Բնակչության պետական ռեգիստրի մասին» նոր օրենքը և տվյալների անվտանգ փոխանակման X-Road հարթակի ներդրումը։