Խորհրդարանում հյուրընկալվել են Նորդիկ-Բալթյան երկրների ԱԳՆ ներկայացուցիչները։

ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը և Հայաստան-Լատվիա, Լիտվա, Էստոնիա բարեկամական խմբի ղեկավար Արսեն Թորոսյանը հունիսի 3-ին հանդիպել են Հյուսիսային Եվրոպա-Բալթյան երկրներ համագործակցության ձևաչափի (Nordic-Baltic Eight) ԱԳ նախարարությունների քաղաքական տնօրենների ու Հայաստանում հավատարմագրված դեսպանների հետ:

Ողջունելով Հայաստան ժամանած հյուրերին՝ Սարգիս Խանդանյանն արժևորել է նորդիկ-բալթիկ երկրների հետ համագործակցությունը: Նա ընդգծել է տարբեր ոլորտներում առկա ներուժի օգտագործման անհրաժեշտությունը, կարևորել այս տարվա սկզբին այդ երկրների խորհրդարանների ղեկավարների այցը Հայաստան: Հանձնաժողովի նախագահը հյուրերի խնդրանքով անդրադարձել է ՀՀ-Եվրամիություն խորացող հարաբերություններին:

Դիվանագիտական գերատեսչությունների ներկայացուցիչները խոսել են Հայաստանի հետ փոխգործակցության կարևորությունից, ողջունել ՀՀ-ի եվրոպական ձգտումներն ու առկա գործակցության ընդլայնումը:

Ազգային ժողովի պատգամավորները ներկայացրել են Հայաստան-Ադրբեջան խաղաղության պայմանագրի կնքման շուրջ ընթացող բանակցությունների արդյունքները՝ նշելով, որ հայկական կողմը պատրաստ է ստորագրել այն:

Նորդիկ-բալթիկ երկրների ներկայացուցիչները նշել են, որ հետաքրքրված են տարածաշրջանում եւ, մասնավորապես, Հայաստանում տեղի ունեցող զարգացումներով ու կարևորում են Հարավային Կովկասում երկարատև խաղաղության հաստատումը:

Հյուրերը Հայաստանի ժողովրդավարական բարեփոխումներին աջակցելու պատրաստակամություն են հայտնել: