Արդեն երեք տարի է՝ Ռուսաստանի Դաշնության Դաշնային ժողովի եւ Բելառուսի Ազգային ժողովի նախաձեռնությամբ իրականացվում է «Հիշողության գնացք» կրթամշակութային ծրագիրը, որին արդեն երկրորդ անգամ մասնակցում է նաեւ Հայաստանը: ԱԺ «Քաղաքացիական պայմանագիր» խմբակցության անդամ Ալեքսեյ Սանդիկովը նշել է, որ նախորդ տարիներին ծրագրին մասնակցել է չորս, իսկ այս տարի արդեն՝ ԱՊՀ անդամ ութ երկիր: Միջոցառմանը մասնակցելու համար դիմել էր Հայաստանի տարբեր մարզերի եւ Երեւանի դպրոցների 80 աշակերտ: ՀՀ ԿԳՄՍ նախարարության աջակցությամբ մրցութային կարգով ընտրվել է 15-ը: Պատգամավորը մայիսի 13-ին խորհրդարանում հանդիպել է մրցույթը հաղթած դպրոցականների հետ: Ալեքսեյ Սանդիկովը մանրամասն ներկայացրել է ծրագիրը: Այն կմեկնարկի հունիսի 20-ին եւ կավարտվի հուլիսի 6-ին: Մասնակիցները «Հիշողության գնացքով» կլինեն Ռուսաստանի եւ Բելառուսի 15 քաղաքներում, կայցելեն Հայրենական մեծ պատերազմի ռազմական փառքի վայրեր, կմասնակցեն Հայրենական մեծ պատերազմում նացիզմի դեմ տարած հաղթանակին նվիրված տարբեր միջոցառումների: Պատգամավորը հույս է հայտնել, որ հայ դպրոցականները հնարավորություն կունենան ձեռք բերելու նոր գիտելիքներ ու ընկերներ, իսկ ծրագրի շնորհիվ ստացած տպավորությունները կլինեն անմոռանալի:
