ՀՀ երրորդ նախագահ Սերժ Սարգսյանը շնորհավորական ուղերձ է հղել Մեծ հաղթանակի եւ Շուշիի ազատագրման օրվա առթիվ:
Ուղերձում ասվում է.
«Սիրելի՛ հայրենակիցներ,
Շնորհավորում եմ մայիսյան մեր եռատոնի` Հայրենական մեծ պատերազմում հաղթանակի, Արցախի պաշտպանության բանակի կազմավորման եւ Շուշիի ազատագրման օրվա առթիվ:
Առաջին հերթին ջերմորեն շնորհավորում եմ Մեծ հայրենականի վետերաններին, մաղթում ամուր առողջություն: Նրանց համար, անկասկած, մեծագույն երջանկություն էր Հայրենական մեծ պատերազմից տասնամյակներ հետո տեսնել հայրենիքի ազատության ու անկախության պայքարում իրենց զավակների եւ թոռների փառավոր հաղթանակը:
Թող մեր հայրերի ու պապերի աչքերում այսուհետ միայն ուրախության արցունքներ հայտնվեն՝ իրենց թոռների ու ծոռների ծննդյան եւ պսակադրության առիթներով, եւ այսուհետ ոչ մի պատերազմ նրանց վիշտ ու տառապանք չբերի:
Մարդկության պատմության մեջ ամենաարյունալի պատերազմում` Երկրորդ աշխարհամարտում քաղաքակիրթ մարդկությունն անասելի տառապանքների ու մեծագույն կորուստների գնով հաղթանակ տարավ ֆաշիզմի, այլատյացության եւ բռնատիրության դեմ:
Փառք այդ հաղթանակը կերտողներին:
Սակայն հաղթանակից հետո աշխարհը, ցավոք, լիովին չձերբազատվեց չարից եւ մարդկությանն սպառնացող վտանգներից: Նեոֆաշիստները, նորօրյա ահաբեկիչները, զանազան հեղափոխական բռնապետերն ու զավթիչները մինչ այսօր չարիք են առաջադեմ մարդկության համար:
Քսանմեկերորդ դարում անգամ ականատես ենք դառնում սարսափելի ավերածություններով պատերազմների, տեղահանությունների ու մարդկային տառապանքների: Սա առաջադեմ մարդկությանը նետված հերթական մարտահրավերն է, որին համատեղ չդիմակայելը հղի է կործանարար հետեւանքներով:
Ավելի քան երեսուն տարի առաջ հայ ժողովուրդը հերոսաբար դիմագրավեց Արցախի դեմ ադրբեջանական ագրեսիային եւ հաղթանակով պսակեց զավթիչի դեմ իր ազատագրական պայքարը:
Պատերազմի ծանր պայմաններում կամավորական ստորաբաժանումների հիմքի վրա կազմավորված Արցախի պաշտպանության բանակն իր մեջ ամփոփեց այն հերոսականությունը եւ ոգին, որ կրում էին հայրենիքի նվիրյալ կամավորները:
Շնորհավորում եմ իմ զինակից ընկերներին` Արցախյան ազատամարտում հայրենասիրության եւ սխրանքի բացառիկ դրսեւորումներով աչքի ընկած հերոսներին, որոնց հետ պատիվ եմ ունեցել անցնելու ամբողջ պատերազմը եւ ազատագրելու մեր հայրենիքի մի մասը` Արցախի սրբազան հողը:
Հաղթանակներն են, որ նոր սխրանքների են կոչում սերունդներին:
Շնորհավորում եմ մեր քաջարի զավակներին, որ չորս տարի առաջ հայ ժողովրդին պարտադրված հերթական պատերազմում գերազանցեցին իրենց պապերի ու հայրերի սխրանքը եւ փառավոր հաղթանակի նոր էջ գրեցին հայոց պատմության մեջ:
Նվիրական այս օրը ես ակնածանքով խոնարհվում եմ մեր բոլոր այն եղբայրների ու քույրերի հիշատակի առջեւ, ովքեր իրենց կյանքը դրեցին հայրենիքի ազատության զոհասեղանին:
Հավերժ փա՛ռք նրանց:
Կրկին շնորհավորում եմ բոլորիս եռատոնի առթիվ, մաղթում հարատեւ խաղաղություն եւ ստեղծագործ աշխատանք:
Էջի հասցեն: https://verelq.am/hy/node/65718