Թուրքիայի ԱԳ նախարար Մեւլութ Չավուշօղլուն քննադատել է Գոլանի բարձունքների հանդեպ Իսրայելի ինքնավարությունը ճանաչելու մասին ԱՄՆ նախագահ Դոնալդ Թրամփի թվիթը: Այս մասին հայտնում է «Անադոլուն»։
«Պետությունների տարածքային ամբողջականությունը միջազգային իրավունքի հիմնարար սկզբունքներից է»,- Twitter-ում գրել է Չավուշօղլուն:
Նա ավելացրե է, որ Իսրայելի գործողությունները օրինականացնելու Թրամփի փորձերը հակասում են միջազգային իրավունքին եւ կհանգեցնեն տարածաշրջանում միայն ավելի շատ բռնության եւ ցավի։
«Թուրքիան պաշտպանում է Սիրիայի տարածքային ամբողջականությունը»,- հավելել է նա:
Ավելի վաղ Դոնալդ Թրամփը Twitter-ում գրել էր.
«52 տարի անց եկել է ժամանակը, որպեսզի ԱՄՆ-ն ճանաչի Գոլանի բարձունքների հանդեպ Իսրայելի ինքնավարությունը, ինչը ծայրահեղ կարեւոր ռազմավարական նշանակություն ունի Իսրայելի պետության անվտանգության եւ տարածաշրջանային կայունության համար»:
Նշենք, որ այս գրառումից հետո ԱՄՆ պետքարտուղար Մայք Պոմպեոն մեկնել է Իսրայել: Արդեն երկրի վարչապետ Բենիամին Նեթանյահուի հետ հանդիպման ժամանակ վերջինս կոչ է արել միջազգային հանրությանը ճանաչել Գոլանի բարձունքների հանդեպ Իսրայելի ինքնավարությունը։
Հիշեցնենք նաև, որ Գոլանի բարձունքները վիճահարույց տարածք է Մերձավոր Արեւելքում։ Դրա զգալի մասը ներկայում վերահսկվում է Իսրայելի կողմից, իսկ արեւելյան մասը՝ Սիրիայի կողմից։ Երկու այս պետությունները Գոլանի բարձունքները համարում են իրենց տարածքի մի մասը։
Էջի հասցեն: https://verelq.am/hy/node/44207