Խորհրդարանական ընդդիմությունը փորձում է օրակարգ ներառել «Զինծառայողի կարգավիճակի և զինվորական ծառայության մասին» օրենքի փոփոխությունների նախագիծը։ «Պատիվ ունեմ» ընդդիմադիր դաշինքի անդամ Թագուհի Թովմասյանի հեղինակած օրինագիծը մերժվեց պաշտպանության եւ անվտանգության հարցերի մշտական հանձնաժողովի կողմից:

Ըստ կանոնակարգի՝ այսօր՝ դեկտեմբերի 7-ին, Թովմասյանը կրկին ներկայացրել է փոփոխությունները՝ հույս ունենալով հիմնավորել դրանք օրակարգում ընդգրկելու և հետագա քննարկման անհրաժեշտությունը։ Փոփոխություններով նախատեսվում է ամրագրել անվճար բժշկական ծառայությունների մատուցման և զինծառայողների անվճար բուժման առաջնահերթությունը:

Նա նշեց, որ չնայած պետական երաշխիքների առկայությանը, գործում լուրջ խնդիրներ կան զինծառայողներին բուժծառայություններ տրամադրելու հետ կապված, որոնք երբեմն ստիպված են լինում իրենց հերթը սպասել ընդհուպ մինչեւ մեկ ամիս:

«Այս նախաձեռնությունը բյուջեի վրա բեռ չի դնում։ Մենք պատերազմական վիճակում ենք, և մենք պարտավոր ենք ամեն օր արձանագրել, որ մենք պարտական ենք զինվորականներին, և մենք պատրաստ ենք վճարել այդ պարտքը», - նշեց պատգամավորը։ Թովմասյանն ընդգծեց, որ և կառավարությունը, և հանձնաժողովը բացասական եզրակացություն են տվել նախաձեռնությանը՝ հղում անելով սովորական քաղաքացիների նկատմամբ խտրականության տարրի առկայությանը:

Նման մոտեցումը Թովմասյանն անընդունելի և նույնիսկ վտանգավոր է համարում։

Պաշտպանության եւ անվտանգության հանձնաժողովի անդամ, «Քաղաքացիական պայմանագիր» խմբակցության պատգամավոր Վիլեն Գաբրիելյանը կոչ արեց դեմ քվեարկել օրինագիծն օրակարգում ընդգրկելուն: Նա նշել է, որ կառավարության տարբեր որոշումներով զինծառայողների համար արդեն նախատեսված են նման արտոնություններ, բնականաբար, կարելի է հետագայում քննարկել դրանք ընդլայնելու հարցը:

Արդյունքում պատգամավորները դեմ քվեարկեցին օրակարգում փոփոխություններն ընդգրկելուն: Կողմ է քվեարկել 28 պատգամավոր, դեմ՝ 55-ը, ձեռնպահ՝ 2-ը։