Ռուսաստանում գտնվող ՀՀ քաղաքացիները կարող են Հայաստան վերադառնալ բացառապես օդային ճանապարհով։ Այս մասին ասուլիսում հայտարարեց ՀՀ արտաքին գործերի նախարարի խոսնակ Աննա Նաղդալյանը։
Նա հիշեցրեց, որ Ռուսաստանի կառավարությունը որոշում է կայացրել, որով արգելել է օտարերկրացիների մուտքն իր երկիր: Իր հերթին ՀՀ կառավարությունը որոշում է կայացրել, որ ՌԴ-ում գտնվող բոլոր ՀՀ քաղաքացիները, նրանց ընտանիքի անդամները, ինչպես նաև այն անձինք, ովքեր չունեն քաղաքացիություն, բայց ունեն ՀՀ-ում բնակվելու իրավունք, կարող են օդային ճանապարհով վերադառնալ Հայաստան։
«Ցամաքային ճանապարհը քաղաքացիների տեղաշարժի համար փակ է, իսկ բեռնատարների տեղաշարժի համար որևէ սահմանափակումներ չկան: Մեր բոլոր քաղաքացիները, ովքեր ցանկանում են Ռուսաստանից վերադառնալ Հայաստան, պետք է օգտվեն բացառապես օդային ճանապարհից»,- շեշտեց Նաղդալյանը։
VERELQ-ը հիշեցնում է, որ Հայաստանում մարտի 16-ից մինչև ապրիլի 14-ը արտակարգ դրություն է հայտարարվել: Ավելի վաղ կառավարությունը պարզաբանել է, թե ի՞նչ է այն իրենից ենթադրում:
Էջի հասցեն: https://verelq.am/hy/node/62616