Առնվազն այս պահի դրությամբ մենք չունենք Ամուլսարի հանքի շահագործումն արգելելու որևէ իրավական հիմնավորում։ Բայց մենք չենք կարող հաշվի չառնել մեր հանրության շրջանում առկա անհանգստությունները: Այս մասինFacebook-ի ուղիղ եթերի ժամանակ հայտարարեց ՀՀ վարչապետ Նիկոլ Փաշինյանը։

Նա նշեց, որ հանրությունը փաստեր ունի և կառավարությունը չի կարող հաշվի չառնել հանրության անհանգստությունները։ Բայց նաև չի կարող հաշվի չնստել ՀՀ տնտեսական հանրության անհանգստության հետ:

Ըստ այդմ, նա տեղեկացրեց, որ բնապահպանական տեսչական մարմնին հանձնարարական է տվել Ամուլսարում սկսել ստուգումներ՝ պարզելու մի շարք հարցերի պատասխաններ, նաև հրապարակված փաստերը

«Կան կետեր, որոնց ստուգումը տեսչական մարմնի իրավասությունների մեջ չի մտնում։ Այս հարցերի վերաբերյալ պետք է պատասխան տա Քննչական կոմիտեում ընթացող քրեական գործը։ Իսկ այն հարցերը, որոնց պատասխանները չենք ունենա տեսչական մարմնի ստուգումների արդյունքում, կունենանք քրեական գործի շրջանակներում», - ասաց Նիկոլ Փաշինյանը։ 

Նա հավաստիացրեց, որ ՀՀ կառավարությունն ունի հնարավորություն իրականացնելու ամենօրյա մոնիթորինգ Ամուլսարի հանքում տեղի ունեցող աշխատանքների ազդեցությունը գնահատելու համար։ Եվ եթե արձանագրվի որևէ խախտում, կառավարությունն ունի նաև լծակներ՝ դրանք չվերացվելու պարագայում հանքի շահագործումը մեկընդմիշտը արգելելու համար:

«Բուն հանքի շահագործման ամենամոտ ժամկետը կարող է լինել 2020 թվականի չորրորդ եռամսյակը, սակայն ամենահավանական ժամկետը 2021 թվականի առաջին եռամսյակն է»,- ասաց նա։

Վարչապետը նաև դիմեց ջերմուկցիներին՝ ապաշրջափակել Ամուլսարի հանք տանող բոլոր ճանապարհները. «Պաշտոնապես խնդրում եմ Ջերմուկի բնակիչներին ապաշրջափակել Ամուլսարի հանք տանող բոլոր ճանապարհները», - ասաց նա:

Փաշինյանը պարզաբանեց, որ որքան երկրի վարկանիշը բարձր է, այնքան էժան փող կարող ենք բերել երկիր: Իսկ Ամուլսարի շուրջ ստեղծված իրավիճակում կան որոշակի ազդակներ, որ եթե իրավիճակը ճշգրիտ չկառավարվի, ապա դա կարող է հանգեցնել ՀՀ վականիշի վատթարացման։

«Դրա հետևանքները մենք կզգանք, մասնավորապես, վարկերի տրամադրման գործընթացում։ Եթե մենք ասում ենք, որ Ամուլսարի հանքը թույլ չենք տալիս շահագործվի, շատ պարզ հարց է ծագում՝ բնապահպանական մտավախությունների՞ց ելնելով, թե՞... Իսկ այս դեպքում այստեղ ծագում է երկրորդ հարցը. ինչո՞ւ եք թույլ տալիս, որ Թեղուտի հանքը շահագործվի», - հավելեց վարչապետը։