ԵԱՀԿ Մինսկի խմբի համանախագահների վերջին հայտարարությունը մտահոգություններ առաջ քաշեց թե՛ Երևանում, թե՛ Ստեփանակերտում, քանզի այն փաստացի նշանակում է, որ բանակցային ձևաչափի փոփոխություն միջնորդները չեն ողջունում: Իսկ դա ՀՀ նոր իշխանությունների՝ ի դեմս վարչապետ Նիկոլ Փաշինյանի, գլխավոր նախապայմանն էր Իլհամ Ալիևի հետ ուղիղ բանակցությունները շարունակելու համար:
VERELQ-ը հայտարարության և Արցախի շուրջ վերջին զարգացումներից զրուցեց Արցախի նախագահի խորհրդական Տիգրան Աբրահամյանի հետ:
-Ինչպե՞ս կգնահատեք ԵԱՀԿ Մինսկի խմբի համանախագահների հայտարարությունը, որը վերլուծական շրջանակները որակեցին ոչ հայանպաստ։ Ձեր կարծիքով, արդյոք սա մեսիջ է Փաշինյանին, որ բանակցային ձևաչափը չի փոխվելու և եթե այո, ապա չե՞ք տեսնում վտանգ, որ բանակցային գործընթացը փակուղում է հայտնվում։
-Արցախի արտգործնախարարությունը մանրամասն անդրադարձել է հայտարարության՝ բանակցային ձևաչափի մասին ձևակերպմանը: Ֆորմատային փոփոխությունը, իսկ ավելի կոնկրետ՝ Արցախի ուղիղ ներգրավվածությունը բանակցություններում անհրաժեշտություն է, առանց որի դժվար է գործընթացում էական տեղաշարժեր արձանագրել:
Ճիշտ է՝ համանախագահները բազմիցս հայտարարել են, որ ինչ-որ փուլում Արցախն անմիջականորեն ներգրավվելու է գործընթացում, սակայն դա բավարար չէ: Որքան շուտ Արցախը ուղիղ ձևով ներգրավվի բանակցություններում, այնքան առավել իրական կդառնա հարցի խաղաղ կարգավորման հնարավորությունները:
Ակնհայտ է նաև, որ համանախագահները փորձում են կանխել Ադրբեջանի կողմից հնարավոր ագրեսիան, ինչը պայմանավորված է վերջին շրջանում պաշտոնական Բաքվի կողմից հնչեցվող կոշտ, իրավիճակը փակուղի տանող հայտարարություններով և պատահական չէ, որ համանախագահները իրենց տեքստում ընդգծված խոսում են ուժի չկիրառման սկզբունքը:
-Ինչո՞ւ համանախագահները այդքան ծավալուն տեքստում չանդրադարձան Ադրբեջանի կողմից լայնածավալ զորավարժություններին, թեպետ մշտապես հորդորում են կողմերին չձեռնարկել քայլեր, որոնք կարող են լարել սահմանը։
-Ըստ էության, անուղղակի անդրադարձ զորավարժություններին կա՝ լարվածության աճին չնպաստող քայլերի մասով, սակայն դա բավարար չի կանխելու Ադրբեջանի հնարավոր ագրեսիան:
Ժամանակը ցույց է տվել, որ մեղմ, անհասցե հայտարարություններով Ադրբեջանի սադրանքները չեն կանխվում:
-Արդյոք համարժեք է պաշտոնական Երևանի արձագանքը այս հայտարարությանը, եթե հաշվի առնենք, որ փաստացի Վիեննան ու Սանկտ Պերերբուրգը ի չիք են դառնում։
-Ներեցեք, բայց պաշտոնական դիրքս թույլ չի տալիս պաշտոնական Երևանի արձագանքը մեկնաբանել:
-Ի՞նչ է նշանակում ՀՀ Անվտանգության խորհրդի նիստի անցկացումը Արցախում։
-Արցախն ու Հայաստանը անվտանգության միևնույն համակարգում են, առկա ռիսկերը ընդհանուր են և այդ տեսակետից համատեղ նիստերի անցկացումը տրամաբանական է: Բացի այս, Անվտանգության խորհրդի նիստն ավելի վաղ էր պլանավորվել, որովհետև այդպիսի աշխատանքների անցկացումը երկար ժամանակ է պահանջում:
-Ի վերջո, հաշվի առնելով վերջին զարգացումները՝ որքանո՞վ է հավանական պատերազմի վտանգն այսօր:
-Պատերազմի հավանականությունն ավելի շատ բարձրացնում է բանակցությունների բացակայության փաստը, մնացածը՝ սրան ուղեկցող պրոցեսներ են: Որքան շուտ միջնորդներն Ադրբեջանին վերադարձնեն բանակցությունների սեղան, այնքան շուտ կողմերը կհեռանան հնարավոր անցանկալի զարգացումներից:
Լիա Խոջոյան
Էջի հասցեն: https://verelq.am/hy/node/43683