Կասպից ծովի իրավական կարգավիճակի կոնվենցիայի տեքստը կներկայացվի հաջորդ տարի Ղազախստանում կայանալիք մերձկասպյան երկրների առաջնորդների հանդիպմանը: Այդ մասին Թեհրանում հայտարարել է Կասպից ծովի հարցերով ՌԴ նախագահի ներկայացուցիչ Իգոր Բրատչիկովը:
«Մերձկասպյան երկրների նախագահների առաջ քաշած սկզբունքների հիման վրա, որոնք առաջարկվել են Աստրախանում, պետությունները կկարողանան պատրաստել փաստաթուղթ երկրների ղեկավարների առաջիկա հադիպմանն ընդառաջ», - հայտարարել է Բրատչիկովը: Նա մասնակցել է Թեհրանում տեղի ունեցած Կասպից ծովի կարգավիճակի շուրջ հատուկ աշխատանքային խմբի աշխատանքներին, որոնք անցկացվում են փոխարտգործնախարարների մակարդակով:
Նա նաև նշել է, որ այս քննարկման ընթացքում կողմերը կարողացել են կարևոր քայլ առաջ կատարել և հասնել լավ արդյունքների, փոխանցում է ՏԱՍՍ-ը:
Նիստին մասնակցել են Ադրբեջանի, Իրանի, Ղազախստանի, Ռուսաստանի և Թուրքմենստանի ներկայացուցիչները, ովքեր քննարկել են Կասպից ծովի իրավական կարգավիճակի և տարածքային պատկանելիության հարցերը: Ապագա հռչակագրի շուրջ լուրջ արդյունքներ են գրանցվել Մերձկասպյան երկրների 4-րդ գագաթաժողովի ընթացքում, որը կայացել է 2014թ.-ի սեպտեմբերին Աստրախանում: Աստրախանում ընդունվել է հռչակագիր, որը ստորագրվել է հինգ պետությունների նախագահների կողմից:
Հռչակագրի գլխավոր սկզբունքը կայանում է նրանոմ, որ կասպյան երկրներն իրենք են որոշելու համագործակցության ուղղություններն այդ տարածաշրջանում: Կողմերը պայմանավորվել են, որ Կասպից ծովում չեն լինելու երրորդ երկրների զինված ուժերը և այլ պետությունների դրոշների ներքո չեն նավարկելու նավերը: Կասպյան երկրները նաև համաձայնեցրել են ազգային գոտիների, այդ թվում ձկնորսական գոտիների լայնությունը:
Էջի հասցեն: https://verelq.am/hy/node/1697