Ռուս զինծառայողները Լեռնային Ղարաբաղի տարածքում խաղաղապահ գործողության շրջանակներում այժմ կենտրոնացած են գերիների վերադարձի, ենթակառուցվածքային նախագծերի իրականացման եւ հումանիտար այլ խնդիրների լուծման վրա:
Այս մասին հայտարարել է ՌԴ ԶՈՒ գլխավոր Շտաբի պետը Վալերի Գերասիմովը, հաղորդում են ռուսական լրատվական գործակալությունները:
«Բացի հրադադարի հսկողությունից եւ բոլոր ռազմական գործողություններից, մեր խաղաղապահների ջանքերը կենտրոնացած են տարածաշրջանում խաղաղ կյանքի վերականգնման վրա: Ընդ որում՝ հաջողությամբ լուծվում են հումանիտար խնդիրները», - ասել է Գերասիմովը՝ հինգշաբթի օտարերկրյա պետությունների ռազմական կցորդների առջեւ կայացած ճեպազրույցում:
Այդ խնդիրներից նա նշել է «տեղանքի եւ օբյեկտների ականազերծումը, ռազմագերիների եւ պահվող անձանց վերադարձը, զոհվածների մարմինների որոնումը, հումանիտար բեռների առաքման անվտանգության ապահովումը եւ ենթակառուցվածքային նախագծերի իրականացումը»:
«Ռուսական զինված ուժերը շարունակում են խաղաղապահ խնդիրներ իրականացնել Լեռնային Ղարաբաղում։ Ավելի քան մեկ տարի առաջ հաջողվել է կանգնեցնել արյունահեղ պատերազմը եւ պայմաններ ստեղծել վերականգնման, տարածաշրջանում խաղաղության հաստատմանը: Լարվածության թուլացման եւ հրադադարի ռեժիմի պահպանման նպատակով ռուս խաղաղապահների կողմից կազմակերպվել է հերթապահություն դիտակետերում եւ խաղաղապահ գործողության անցկացման շրջանի պարեկություն», - ասել է Գերասիմովը:
Էջի հասցեն: https://verelq.am/hy/node/99714