ՀՀ ոստիկանության պարեկապահակային ծառայության գնդի տարածքը երկրորդ օրն է, ինչ բռնության սպառնալիքով պահում են «Սասնա ծռեր» խմբավորման անդամները: Վերջիններս նաև շարունակում են պատանդ պահել ոստիկանների՝ պահանջելով ազատ արձակել «Հիմնադիր խորհրդարանի» անդամ Ժիրայր Սեֆիլյանին, ով հունիսից գտնվում է անազատության մեջ՝ ապօրինի կերպով զենք և ռազմամթերք ձեռք բերելը, փոխադրելը և պահելը կազմակերպելու մեղադրանքով:
Քիչ առաջ «Նոր Հայաստան» նախաձեռնությունը ֆեյսբուքյան իր էջում գրել է, որ տեղեկատվություն կա այն մասին, որ իրավապահները պատրաստվում են գրոհել:
«Հրատապ: Ինֆորմացիա կա, ըստ որի ներսում անջատել են Սասնա ծռերի անդամների հեռախոսահամարները և պատրաստվում են գրոհել նրանց վրա։ Հորդորում ենք քաղաքացիներին շտապ հավաքվել Էրեբունիում»,- ասված է հաղորդագրության մեջ:
Նշենք, որ հեռախոսակապ հաստատել ներսում գտնվող «Սասնա Ծռեր» աջազգայնական խմբավորման անդամ Վարուժան Ավետիսյանի հետ VERELQ-ին չհաջողվեց:
Էջի հասցեն: https://verelq.am/hy/node/9855