Անցյալ շաբաթ վարչապետի պաշտոնակատար Նիկոլ Փաշինյանի հրավիրած Անվտանգության խորհրդի նիստում, որին մասնակցել են նաև ԱԺ խմբակցությունների ղեկավարները, որևէ անհամաձայնություն չի եղել հայ-ադրբեջանական սահմանին լարվածության թուլացման վերաբերյալ նրա ներկայացրած առաջարկի վերաբերյալ: Այդ մասին այսօր՝ մայիսի 31-ին, ԱԺ ԱԺ ճեպազրույցների ընթացքում հայտնել է «Լուսավոր Հայաստան» խմբակցության ղեկավար Էդմոն Մարուքյանը:
ԱԽ նիստի ժամանակ Նիկոլ Փաշինյանի՝ հայ-ադրբեջանական սահմանին լարվածության թուլացման վերաբերյալ ներկայացրած առաջարկից հետո, որը ենթադրում է հայկական և ադրբեջանական ուժերի հայելային հետքաշում և սահմանագծին ՌԴ-ի կամ ԵԱՀԿ ՄԽ համանախագահ այլ երկրների դիտորդների տեղակայում, ԱԳ նախարարի պաշտոնակատար Արա Այվազյանը հրաժարական տվեց:
Մարուքյանը զարմացել է ԱԳ նախարարի հրաժարականից, քանի որ ԱԽ նիստի ժամանակ որևէ առարկություն չին եղել Փաշինյանի առաջարկի վերաբերյալ. «ԱԽ նիստին իր հետ կապված որևէ խոսակցություն չի եղել: Հատված կար, որ վարչապետի պաշտոնակատարն ասում էր՝ նախարարին հանձնարարական եմ տվել, նախարարը գլխով էր անում: Դա ուղիղ եթերում կար: Այլ բան չի եղել, ու ես զարմացա, երբ իմացա, որ նա հրաժարական է տվել»:
Մարուքյանն ընդգծեց, որ այսօրվա կառավարությունը ժամանակավոր պաշտոնակատարներից է կազմված:
«Սահմանադրաիրավական կարգավորումները թույլ չեն տալիս որևէ հրաժարական տված նախարարի փոխարեն նշանակել նոր նախարար: Ցանկացած նախարարի հրաժարական այս պարագայում երկիրը կարող է դնել շատ բարդ վիճակում: Դժվար չէ, կարծում եմ, մեր պետական շահերը ներկայացնել ևս երեք շաբաթ: Ընտրություններից հետո այդ փոփոխությունները, բնականաբար, տեղի կունենան: Այս պարագայում, կարծում եմ, ճիշտը Հանրապետությանը ծառայելն է և ոչ թե ամենածանր պահին դուրս գալ և այդ ծանր բեռը թողնել ուղղակի օդում», - ասել է նա:
Մեկնաբանելով Նիկոլ Փաշինյանի՝ Հայաստանի սահմանին խաղաղապահներ-դիտորդներ ներգրավելու առաջարկը, Մարուքյանւ նշել է. «Եթե Փաշինյանի այդ առաջարկն ընդունվի, ապա սահմանին լարվածությունը կթուլանա: Սակայն մինչև այս պահը որևէ երկրի, այդ թվում՝ Ադրբեջանի կողմից այս առաջարկի մասին մեկնաբանություն և արձագանք չեն եղել»:
Էջի հասցեն: https://verelq.am/hy/node/88163