Վրաստանի արտաքին գործերի նախարար Դավիթ Զալկալիանին լրագրողներին մեկնաբանել է ԱՄՆ պետքարտուղար Էնթոնի Բլինկենի հետ հեռախոսազրույցը, հաղորդում է Վրաստանի Առաջին ալիքը: Նա նշել է, որ սա առաջին բարձր մակարդակի շփումն էր ԱՄՆ նոր վարչակազմի հետ։

«Այն փաստը, որ ինքն է զանգահարել եւ ցանկություն հայտնել մեզ հետ խոսել գլոբալ անվտանգության հետ կապված լուրջ խնդիրների մասին, ցույց է տալիս, թե որքան են նրանք կարեւոր համարում Վրաստանը աշխարհաքաղաքական համատեքստում, ինչպես նաեւ ԱՄՆ-ի եւ Վրաստանի ռազմավարական գործընկերության տեսանկյունից», - հայտարարել Է Զալկալիանին:

Նրա խոսքով՝ կողմերը քննարկել են Վրաստանի ներդրումը գլոբալ անվտանգության, ինչպես նաեւ ամերիկա-վրացական համակարգված համագործակցության եւ այսօր Վրաստանի համար արդիական մարտահրավերների հարցեր:

«Նշվել է, որ անհրաժեշտ է համաճարակի հետ կապված այդ մարտահրավերների ֆոնին վերականգնել մեր երկրի տնտեսությունը հետպանդեմական շրջանում։ Բացի այդ, օկուպացված տարածքների, ինչպես նաև տարածաշրջանում աշխարհաքաղաքական իրավիճակի հետ կապված անվտանգության խնդիրների լուծման համար կարևոր է, որ մենք առավելագույնս կենտրոնանանք այդ թեմաների վրա։ Մենք պետք է սերտորեն համագործակցենք մեր գլխավոր ռազմավարական գործընկերոջ հետ եւ անհրաժեշտ է, որպեսզի այն գործընթացները, որոնք տեղի են ունենում երկրի ներսում, արհեստականորեն ստեղծված քաղաքական գործընթացը, այսպես կոչված, արհեստական ճգնաժամը, անհրաժեշտ է հնարավորինս շուտ ավարտել։ Անհրաժեշտ է գտնել իրավիճակը դեէսկալացնելու միջոց», - նշել է նա։

Վրաստանի ԱԳ նախարարի խոսքով՝ զրույցն անդրադարձել է նաեւ ՆԱՏՕ-ին Վրաստանի ինտեգրման ուղղությանը:

«Իհարկե, մենք այստեղ ունենք դիրքորոշումների լիակատար համապատասխանություն եւ պետական քարտուղարի կողմից նման մոտեցում, որ այն երկիրը, որը շատ լուրջ առաջընթաց է ցույց տալիս ՆԱՏՕ-ին ինտեգրվելու տեսանկյունից, բարեփոխումների, գործնական գործիքների կիրառման տեսանկյունից, արժանի է նույնիսկ ավելիին: Մենք պայմանավորվել ենք, որ այս եւ հաջորդ տարվա համար նախատեսված բարձր մակարդակի հանդիպումները առավելագույնս կօգտագործվեն համապատասխան որոշումների եւ հռչակագրերում արտացոլելու համար», - հավելել է Զալկալիանին: