«Լուսավոր Հայաստան» կուսակցությունում անտրամաբանական են համարում վարչապետի թեկնածու առաջադրելը գործող վարչապետ Նիկոլ Փաշինյանի հրաժարականից հետո։
Այսօր՝ ապրիլի 5-ին, լրագրողների հետ զրույցում ԱԺ ԼՀԿ խմբակցության անդամ Անի Սամսոնյանը նշեց, որ հաշվի առնելով արտահերթ ընտրություններ անցկացնելու վերաբերյալ ձեռք բերված քաղաքական պայմանավորվածությունները, անտրամաբանական է համարում Փաշինյանի հրաժարականից հետո վարչապետի թեկնածու առաջադրելը:
Լրագրողների այն պարզաբանմանը, թե նման դեպքում ինչ նկատի ուներ ԼՀԿ առաջնորդ Էդմոն Մարուքյանը, երբ հայտարարում էր ԸՕ-ում փոփոխությունների ընդունման դեպքում բոլոր պայմանավորվածությունները զրոյացնելու մասին, Սամսոնյանը նշեց, որ գործող վարչապետի հետ ԼՀԿ ղեկավարի հանդիպման ժամանակ Ընտրական օրենսգրքում փոփոխությունների վերաբերյալ որեւէ կոնկրետ պայմանավորվածություն չի եղել:
«Միայն վարչապետի բանավոր հավաստիացումն էր, որ կոնսենսուսի բացակայության դեպքում ԸՕ-ում փոփոխություններ չեն ընդունվի», - հայտարարեց պատգամավորը: Ուստի, ԼՀԿ-ում փոփոխությունների ընդունումը չեն գնահատում որպես «ձեռք բերված պայմանավորվածություններից հետքաշում»։ Սամսոնյանի խոսքով, միակ պայմանավորվածությունն արտահերթ ընտրությունների անցկացումն է սեղմ ժամկետներում:
«Մենք մտադիր չենք մեր գործողություններով իշխանություններին առիթ տալ հրաժարվելու արտահերթ ընտրությունների շուրջ ձեռք բերված պայմանավորվածություններից», - հավաստիացրեց պատգամավորը՝ դրանով իսկ բացառելով այդ գումարման խորհրդարանում կուսակցության կողմից վարչապետի թեկնածու առաջադրելու հնարավորությունը:
Բացի այդ, Սամսոնյանը վաղաժամ է համարել կուսակցության համամասնական ցուցակների կազմումը։ Մենք կարծում ենք, որ սկզբում վարչապետը պետք է հրաժարական տա, որից հետո պարզ կդառնա՝ արտահերթ ընտրություններ կանցկացվեն, թե ոչ», - հայտարարեց պատգամավորը։
Սամսոնյանը չբացառեց, որ արտահերթ ընտրություններ տեղի չեն ունենա։ «Մենք ոչինչ չենք բացառում, բայց ինձ սխալ է թվում պայմանավորվածությունների ձեռքբերումից հետո խոսել դրանց հնարավոր խախտման մասին», - ասել է նա:
Էջի հասցեն: https://verelq.am/hy/node/84439