Պետական եկամուտների կոմիտեի նախագահ Էդուարդ Հովհաննիսյանը կառավարության այսօրվա նիստում հայտարարել է, որ այս տարվա առաջին եռամսյակում Հայաստանում առևտրաշրջանառությունն ու կատարված գործարքները աճել են։ 

Նրա խոսքով, առևտրաշրջանառության և կատարված գործարքների մասով մարտ ամսվա ընթացքում նախորդ տարվա մարտ ամսվա համեմատ ՀԴՄ կտրոններով և հաշվարկային փաստաթղթերով կատարված գործարքների քանակն ավելի է 8 մլն 647 հազար հատով, որի գումարային արտահայտության տարբերությունը նախորդ տարվա համեմատ կազմում է 122 մլրդ դրամ։ «Եռամսյակային կտրվածքով իրացման շրջանառության տարբերությունը կազմել է 116․8 մլրդ դրամ»,- ասաց նա։

Ըստ ՊԵԿ նախագահի՝ հարկային եկամուտների հավաքագրումների մասով առաջին եռամսյակի համար սահմանված է 305 մլրդ դրամ, փաստացի հավաքագրված հարկային եկամուտները կազմել են 332․9 մլրդ դրամ։ Դրական տարբերությունը կազմում է 27․9 մլրդ դրամ։

Կանխատեսվում է, որ այս տարվա հարկային եկամուտների հավաքագրման ցուցանիշը կգերակատարվի շուրջ 4 մլրդ դրամով։