Հայաստանի վարչապետ Նիկոլ Փաշինյանը մարտի 28-ին Արմավիրի մարզի բնակիչների հետ հանդիպման ժամանակ հայտարարել է, որ ապրիլին հրաժարական կտա արտահերթ խորհրդարանական ընտրություններ անցկացնելու համար:
«Ապրիլին ես հրաժարական կտամ, ոչ թե հեռանալու, այլ արտահերթ խորհրդարանական ընտրություններ անցկացնելու համար։ Այդ ընթացքում շարունակելու եմ մնալ վարչապետի պաշտոնակատար», - ասել է վարչապետը։
Դիմելով հայաստանցիներին՝ նա խոստացել է ավելի լավ ծառայել երկրին, քան նախկինում՝ ընտրողների աջակցության դեպքում։ Իսկ եթե քաղաքացիները չաջակցեն Փաշինյանի թիմին, ապա նա վստահեցրեց, որ իշխանությունը կփոխանցի։
Հայաստանում արտահերթ խորհրդարանական ընտրությունները պետք է տեղի ունենան հունիսի 20-ին։ Մինչ այդ Փաշինյանը կկատարի վարչապետի պարտականությունները։ Ըստ օրենքի՝ ԱԺ-ն հրաժարականից հետո պետք է ընտրի նոր վարչապետ։ Եթե երկու փուլերի արդյունքում Կառավարության ղեկավարի պաշտոնի թեկնածուներից ոչ մեկը չի ստանա անհրաժեշտ քանակությամբ ձայներ, ապա խորհրդարանն ինքնալուծարվում է:
Հանրապետությունում քաղաքական ճգնաժամը սկսվել է անցյալ տարվա նոյեմբերին՝ Ադրբեջանի հետ զինադադարի ստորագրումից հետո։ Եռակողմ համաձայնագրով Երեւանի վերահսկողության տակ գտնվող Լեռնային Ղարաբաղի շրջանների մի մասը անցել է Բաքվին։
Փաշինյանի քաղաքական հակառակորդները և ընդդիմադիր տրամադրված բնակչությունը դժգոհ են մնացել հրադադարի պայմաններից՝ վարչապետին մեղադրելով Ադրբեջանի առջև կապիտուլյացիայի և սեփական ժողովրդին դավաճանելու մեջ։ Երկրում սկսվել են զանգվածային հանրահավաքներ, ցուցարարները պահանջում էին Փաշինյանի հրաժարականը։
Էջի հասցեն: https://verelq.am/hy/node/83920