Նախագահի հետ հանդիպմանը քննարկվել են հարցեր, որոնք վերաբերել են ԶՈՒ գլխավոր շտաբի պետի ազատման դիմումը ՍԴ ուղարկելուն: Նախագահը լսեց մեր տեսակետները, ասաց, որ առաջիկա ժամերին իր որոշման մասին կհայտնի: Այս մասին «Հայրենիքի փրկության շարժման» պատվիրակության և նախագահ Արմեն Սարգսյանի հանդիպումից հետո լրագրողներին հայտնեց «Հայրենիք» կուսակցության նախագահ Արթուր Վանեցյանը:
Նա նշեց, որ Արմեն Սարգսյանը տեղեկացրել է պատվիրակության անդամներին, որ ի գիտություն կընդունի իրենց խոսքն ու կիրականացնի իր սահմանադրական լիազորությունը:
«Նախագահը որևէ բան չի ասել, թե ինչու ԳՇ պետին ազատելու միջնորդագրի հարցով չի դիմել ՍԴ»,- հավելել է Վանեցյանը:
VERELQ-ը տեղեկացնում է, որ հհանդիպմանը մասնակցել են նաև ՀՅԴ-ական Արծվիկ Մինասյանը, ՀՀԿ-ական Վահրամ Բաղդասարյանը և «Հայրենիքի փրկության շարժման» վարչապետի միասնական թեկնածու Վազգեն Մանուկյանը։
Ի դեպ, քիչ առաջ Գլխավոր շտաբը հանդես եկավ նոր հայտարարությամբ, ներկայացնելով վերլուծություն Օնիկ Գասպարյանի պաշտոնից ազատելու շուրջ զարգացումների մասով, որում նշվում է, որ ՀՀ ԶՈՒ գլխավոր շտաբի պետ, գեներալ-գնդապետ Օնիկ Վիկտորի Գասպարյանը մինչև 8-օրյա ժամկետի լրանալը (նախագահի կողմից Սահմանադրական դատարան դիմելուց հետո սկսում են գործել այլ ժամկետներ) շարունակում է իր ծառայությունը հայրենիքին և ժողովրդին, հանդիսանում է Զինված ուժերի բարձրագույն զինվորական հրամանատարը։
Էջի հասցեն: https://verelq.am/hy/node/82239