Քանի դեռ լուծված չէ ԶՈՒ գլխավոր շտաբի պետ Օնիկ Գասպարյանի պաշտոնանկության հարցը, երկրում կայունություն հնարավոր չէ ապահովել։ Նման տեսակետ այսօր՝ մարտի 1-ին, հայտնել է արտաքին հարաբերությունների հանձնաժողովի նախագահ, «Իմ քայլը» դաշինքի խմբակցության պատգամավոր Ռուբեն Ռուբինյանը։
«Կարծիքներն այն մասին, թե առանց գլխավոր շտաբի ղեկավարի շուրջ ստեղծված իրավիճակը հանգուցալուծելու հնարավոր է այս կամ այն քայլերով երկրում կայունություն ապահովել, սխալ են։ Համաձայնեք, որ երբ ԶՈՒ ԳՇ պետը մտնում է քաղաքական գործընթացների մեջ, դա ոչ մի կերպ չի կարող նպաստել կայունությանը», - հայտարարեց պատգամավորը։
Ռուբինյանը նշեց, որ կամ ՀՀ ԳՇ գործող ղեկավար Օնիկ Գասպարյանը պետք է ինքնակամ ստորագրի իր հրաժարականի դիմումը, կամ նրան աշխատանքից ազատելու մասին հրամանագիրը պետք է ստորագրվի: Միայն դրանից հետո իշխանությունները քաղաքական ուժերի հետ կոնսուլտացիաներ կսկսեն արտահերթ ընտրությունների անցկացման շուրջ։
Ընդ որում, Ռուբինյանը չի կարծում, որ այդպիսով իշխանությունները նախապայմաններ են առաջադրում արտահերթ ընտրություններ անցկացնելու համար։ Գլխավոր շտաբի պետի պաշտոնանկությունը Սահմանադրության մեջ ամրագրված երկրի վարչապետի լիազորությունների իրականացումն է, վստահ է նա։
«ԶՈՒ գլխավոր շտաբը և ԶՈՒ ԳՇ պետը պահանջել է վարչապետի հրաժարականը։ Ուզում եմ հիշեցնել, որ զինված ուժերը չպետք է միջամտեն քաղաքական գործընթացներին։ Եթե ԳՇ պետը քաղաքական հայտարարություններ է անում, դա ավտոմատ կերպով նշանակում է, որ նա չի համապատասխանում զբաղեցրած պաշտոնին։ Այդ կապակցությամբ վարչապետը նրան աշխատանքից ազատելու առաջարկ է ուղարկել՝ իր լիազորությունները իրականացնելով ստեղծված իրավիճակին համապատասխան», - հայտարարել է նա։
Էջի հասցեն: https://verelq.am/hy/node/82069