ՀՀ վարչապետ Նիկոլ Փաշինյանը գրառում է արել, որով անդրադարձել է նախօրեին ԿԳՄՍ նախարար Արայիկ Հարությունյանի ակնարկ-հայտարարությանը, ուղղված ԲՀԿ առաջնորդ Գագիկ Ծառուկյանին:

«Դժվար է չհամաձայնել ԿԳՄՍ նախարարի հետ.

Սկզբից օտարերկրացի կանանց հրավիրում ես եկեղեցի ցույց տալու: Հետո, լինելով ոստիկանության սերժանտ, եկեղեցու տարածքում խմբով բռնաբարում ես հյուրերին ու կողոպտում նրանց: Հետո զբաղվում ես ազգային արժեքների եւ ազգային ինքնության պաշտպանությամբ: Հիրավի «ազգանպաստ» գործունեություն:

Աջակցել, միանշանակ աջակցել»,- գրել է վարչապետը Facebook-ի իր  էջում:

VERELQ-ը հիշեցնում է, որ նախօրեին ԿԳՄՍ նախարարն ԱԺ ամբիոնից հայտարարել էր. «Կրթական չափորոշիչների շնորհիվ մի խումբ կոտայքցիներ ապագայում կսովորեն հարգել դիմացինին, ղեկավարել սեփական հորմոնները և այլևս եկեղեցու տարածքում չի լինի օտարի նկատմամբ սեռական բռնություն»։

1979թ-ի մեղադրական դատավճռով Ծառուկյանը մեղադրվել է ՀՍՍՀ քրեական օրենսգրքի 112.1 և 144 հոդվածներով նախատեսված արարքների համար, այն է՝ բռնաբարություն և կողոպուտ: Վճռաբեկ դատարանը 1991թ-ին կայացրած վճռով բեկանել է Ծառուկյանի նկատմամբ 22 տարի առաջ կայացրած մեղադրական դատավճիռը, արդարացրել ու նրա նկատմամբ քրեական հետապնդումը դադարեցնելու որոշում է կայացրել:

Հիշեցնենք նաև, որ թավշյա հեղափոխությունից հետո որոշ ընթացք Նիկոլ Փաշինյանի ու Գագիկ Ծառուկյանի «ջրերը մի  առվով էին հոսում». Ծառուկյանը, նախ, կանգնեց ապագա վարչապետի կողքին, ապա նրանք  համատեղ հուշագիր ստորագրեցին` 2018-ի դեկտեմբերին արտահերթ խորհրդարանական ընտրություններ անցկացնելու վերաբերյալ։