Նոր կորոնավիրուսի դեմ պայքարի շրջանակներում Լատվիայի խորհրդարանի պատգամավոր, Լատվիա-Հայաստան միջխորհրդարանական բարեկամական խմբի ղեկավար Սերգեյ Պոտապկինը պաշտպանություն ապահովող, բազմակի օգտագործման 600 դիմակ է նվիրաբերել «Նորք» ինֆեկցիոն կլինիկական հիվանդանոցին՝ աջակցելով նոր տիպի վարակի դեմ պայքարում հայաստանյան բուժանձնակազմի անվտանգ և պաշտպանված աշխատանքի ապահովմանը։
Պոտապկինը նշել է, որ մարտ ամսին նա պլանավորում էր այցելել Հայաստան, սակայն աշխարհում ստեղծված նոր իրավիճակով պայմանավորված նրա այցը հետաձգվել է.
«Մենք բոլորս այժմ ստիպված ենք պայքարել մարդկության առաջ ծառացած գլոբալ մարտահրավերի դեմ, այն մեր եղբայրության, համընդհանուր աջակցության խնդիր է։ Այս խորհրդանշական քայլով իմ աջակցությունն եմ հայտնում եղբայրական հայ ժողովրդին և հույս ունեմ, որ բոլորս կհաղթահարենք այս փորձությունը և կշարունակենք մեր բարեկամությունը և համագործակցությունը»։
Սերգեյ Պոտապկինը 2016 թվականի ապրիլյան քառօրյա պատերազմի օրերին Արցախի Հանրապետություն այցելած օտարերկրյա երկու խորհրդարանականներից է, որը դրանից հետո հայտնվել է Ադրբեջանի «սև ցուցակում»։ Այցի ընթացքում նա ընդգծել է, որ Արցախի ժողովուրդը միայնակ չէ և Եվրոպայում ունի համախոհներ։
Նա «Համագործակցություն հանուն արդարության և խաղաղության» խորագրով Արցախի բարեկամների համաժողովի պատվիրակության անդամներից է, նաև տարբեր ամբիոններից, այդ թվում Իսրայելում, բարձրաձայնել է հայոց ցեղասպանության ճանաչման խնդիրը։ Ս․Պոտապկինը Լատվիայի «Սոգլասիե» կուսակցության ակնառու գործիչներից է։
Էջի հասցեն: https://verelq.am/hy/node/63855