Արսեն Թորոսյանը կրոնական հաստատություններին կոչ է արել զերծ մնալ զանգվածային ծեսերից

Առողջապահության նախարար Արսեն Թորոսյանը կրոնական հաստատություններին կոչ է արել զերծ մնալ զանգվածային ծեսերից։


«Անկեղծ ասած՝ տեղյակ չեմ, թե մեր երկրում գործող կրոնական կազմակերպություններն ինչ որոշումներ ունեն իրենց ծիսակատարությունները շարունակելու կամ դադարեցնելու վերաբերյալ, սակայն ուզում եմ հիշեցնել, որ առնվազն Հարավային Կորեայում և մեր հարևան Իրանում նոր կորոնավիրուսային վարակը իր պայթյունաձև տարածումն է ստացել հենց կրոնական արարողությունների պատճառով։


Հետևաբար կոչ եմ անում մեր քաղաքացիներին և բոլոր կրոնական կազմակերպություններին զերծ մնալ զանգվածային ծեսերից՝ չեղարկելով դրանք մինչև համաճարակի վտանգի իսպառ վերացումը։ Մարդկանց առողջությունը վեր է ամեն ինչից»,- Ֆեյսբուքում գրել է Արսեն Թորոսյանը։



Մարտի 13-ին Ամենայն Հայոց կաթողիկոսի նախագահությամբ Հայաստանի եպիսկոպոսները կորոնավիրուսի համավարակի վերաբերյալ հայտարարություն են տարածել՝ մարդկանց հորդորելով հանդես բերել առավելագույն զգոնություն ու պատասխանատվություն, հետևողականությամբ ու ամենայն լրջությամբ պահպանել մասնագիտացված կառույցների կողմից սահմանված պահանջներն ու ցուցումները և իրականացնել համավարակի կանխարգելման բոլոր միջոցառումները:


«Մեր Եկեղեցին միշտ իրականացրել է իր հոգեփրկչական ծառայությունը և այսօր ևս շարունակելու է տերունապատվեր իր առաքելության բնականոն ընթացքը` հոգևոր խնամք մատուցելով իր հավատավոր զավակներին, քաջալերելով ամուր մնալու հավատքի մեջ, առ Աստված հավատքով և աղոթքով դիմագրավելու դժվարություններն ու նեղությունները»,- նշված է Մայր Աթոռի հաղորդագրությունում։


Մայր Աթոռը մինչ այժմ հայտարարություն չի արել, թե արդյոք կիրակնօրյա պատարագը տեղի է ունենալու մարդկանց մասնակցությամբ, թե ոչ։


Հայաստանում Էջմիածին քաղաքը կորոնավիրուսի վարակի գլխավոր օջախն է։


Նշումներ:

Էջի հասցեն: https://verelq.am/hy/node/62327