Այս րոպեներին ՀՀ քաղաքացիական ավիացիայի կոմիտեում ընթանում է քննարկում՝ կորոնավիրուսով պայմանավորված իրավիճակով արգելել չվերթները դեպի Իտալիա թե ոչ հարցի շուրջ:
VERELQ-ի հետ զրույցում քաղաքավիացիայի լրատվական ծառայությունից հայտնեցին, որ այս պահին դեռ վերջնական որոշում չկա, քննարկումը շարունակվում է, իսկ արդյունքները հայտնի կդառնան շուրջ երկու ժամից:
VERELQ-ը հիշեցնում է, որ ՀՀ ԱԳ նախարարությունն այսօր հորդորեց քաղաքացիներին ձեռնպահ մնալ Իտալիա մեկնելուց.
«Հաշվի առնելով նոր տիպի կորոնավիրուսի (COVID-19) վարակի տարածման կանխարգելման ուղղությամբ Իտալիայի իշխանությունների կողմից հայտարարված միջոցառումները՝ ՀՀ քաղաքացիներին կոչ ենք անում խստագույնս ձեռնպահ մնալ Իտալիա այցելությունից, իսկ ներկայումս Իտալիայում գտնվող ՀՀ քաղաքացիներին՝ անհապաղ ընդհատել ուղևորությունը և վերադառնալ ՀՀ։
ՀՀ քաղաքացիներին հորդորում ենք մշտական կապ պահպանել Իտալիայում ՀՀ դեսպանության հետ», - ասված է ԱԳՆ-ի հայտարարության մեջ։
Ավելի վաղ տեղեկացրել էինք, որ Իտալիայի վարչապետ Ջուզեպե Կոնտեն ստորագրել է դեկրետ, համաձայն որի, կորոնավիրուսի տարածման դեմ պայքարելու նպատակով, սահմանափակվում է բնակչության տեղաշարժը երկրի ամբողջ տարածքում:
Էջի հասցեն: https://verelq.am/hy/node/61991