Հայաստանը մեծ ուշադրությամբ հետևում է Սիրիայի հյուսիսում Ռուսաստանի ու Թուրքիայի մասնակցությամբ տեղի ունեցող զարգացումներին և մշտապես կապի մեջ է պաշտոնական Մոսկվայի հետ։
Այս մասին VERELQ-ի հարցին ի պատասխան մարտի 5-ին Եռաբլուր պանթեոնում հայտարարեց Հայաստանի զինված ուժերի գլխավոր շտաբի պետ Արտակ Դավթյանը։
Նրա խոսքով, Սիրիայում տեղի ունեցող զարգացումներն անհանգստացնող են և Հայաստանի ուշադրության ներքո են.
«Ոչ միայն հետևում ենք, այլև մշտապես կապի մեջ ենք մեր ռազմավարական գործընկերոջ՝ Ռուսաստանի հետ: Ըստ անհրաժեշտության՝ մյուս պետությունների հետ ևս համագործակցում ենք, որպեսզի տեղեկատվությունը ստանանք առաջին ձեռքից և ամբողջ ծավալով, քանի որ կարծում ենք՝ դա ուղիղ կապ կարող է ունենալ հետագայում մեր տարածաշրջանի զարգացումների հետ», - ասաց Դավթյանը՝ հավելելով, որ ստեղծված իրավիճակը վտանգներ չի ստեղծում Սիրիայում գործող Հայաստանի հումանիտար առաքելության համար։
«Մեր հումանիտար առաքելության համար վտանգներն ավելին չեն, քան կային մեկ կամ երկու ամիս առաջ։ Նոր վտանգներ չկան»,- ասաց Արտակ Դավթյանը։
VERELQ-ը հիշեցնում է, որ 2018 թվականին Հայաստանը վարչապետի հայտարարած ծրագրի շրջանակներում որոշում կայացրեց Սիրիա հումանիտար մասնագետների խումբ ուղարկել: 2019 թվականի փետրվարին հիմնականում բժիշկներից, ինժեներներից, սակրավորներից կազմված խումբը ժամանեց Սիրիա:
2019 թվականի փետրվարի 8-ից մինչև 2020 թվականի փետրվար խումբը հետազոտել և բուժել է ավելի քան 14 հազար հիվանդի: Սակրավորներն ականազերծել են ավելի քան 126 հազար քառակուսի մետր տարածք:
Էջի հասցեն: https://verelq.am/hy/node/61758