2018 թվականի նախընտրական գործընթացի ընթացքում ես արել եմ քաղաքական հայտարարություն, որ առաջիկա հինգ տարիների ընթացքում մենք պետք է 2,5 մլրդ դոլար հավելյալ միջոցներ ծախսենք մեր անվտանգության կարիքների վրա, մասնավորապես ԶՈՒ մարտունակության և սպառազինության մակարդակը բարձրացնելու համար և այդ 2,5 մլրդ դոլարից 1,5 մլրդը պետք է գոյանա հակակոռուպցիոն արդյունավետ պայքարի միջոցով, այդ թվում գողացված միջոցների հետբերման գործընթացի միջոցով: Այս մասին կառավարության այսօրվա նիստում հայտարարեց վարչապետ Նիկոլ Փաշինյանը:
Նրա խոսքով, իրեն գոհացնում և բավարարում են այն ծավալները, որոնք առկա են: Ավելին, վարչապետը հայտարարեց, որ աննախադեպ հաջողություններ ունեն: Եվ թվարկեց.
«Այս տարի Հատուկ քննչական ծառայությունը վերականգնել է 7 անգամ ավելի շատ գումար, քան Հատուկ քննչական ծառայության գոյության ողջ ընթացքում, իսկ այն գոյություն ունի արդեն 11 տարի: Սա ցուցանիշ է, որը չի կարելի չընդունել, բայց մյուս կողմից մեր սահմանած նշաձողերն շատ ավելի բարձր են: Մենք մեր հակակոռուպցիոն համակարգերի բարելավման, օրենսդրության կատարելագործման միջոցով պետք է այս միջոցը դարձնենք ավելի արդյունավետ, որովհետև մենք բոլորս գիտենք, որ դրա պոտենցիալը կա», -ասաց Նիկոլ Փաշինյանը:
Նա նաև տեղեկացրեց, որ հակակոռուպցիոն պայքարն ավելի արդյունավետ դարձնելու և շատ ավելի մեծ գումարներ պետական բյուջե վերադարձնելու թեմայով վերջին շրջանում քննարկումներ եղել: Առաջիկայում էլ դա լինելու է կառավարության ամենակարևոր խնդիրներից մեկը:
Էջի հասցեն: https://verelq.am/hy/node/60763