Փետրվարի 12-ին ԱՄՆ-ում ԱՀ մշտական ներկայացուցիչ Ռոբերտ Ավետիսյանը ելույթ է ունեցել ԱՄՆ Կոնգրեսում տեղի ունեցած միջոցառմանը՝ նվիրված Բաքվում հայերի ջարդերի 30-րդ տարելիցին։
Իր ելույթում Ռոբերտ Ավետիսյանը, մասնավորապես, կարևորել է ԱՄՆ Կոնգրեսում նման միջոցառման անցկացումը՝ հարգելու Բաքվում կազմակերպված ջարդերի զոհերի հիշատակը և դատապարտելու ադրբեջանական իշխանությունների կողմից հայ ազգաբնակչության դեմ իրագործված ոճրագործությունները։
Արցախի մշտական ներկայացուցիչն ընդծել է, որ հաղթահարելով բոլոր դժվարություններն ու զրկանքները և հաղթանակելով իրեն պարտադրված պատերազմում՝ արցախահայությունը հաստատակամորեն շարժվում է իր ընտրած ուղիով՝ կառուցելով ու զարգացնելով ժողովրդավարական արժեքների վրա հիմնված պետական ինստիտուտներ և հզոր բանակ՝ ստանձնելով տարածաշրջանում կայունություն և խաղաղություն ապահովելու պատասխանատվության իր բաժինը։
Միջոցառմանը մասնակցում էին ԱՄՆ Կոնգրեսի անդամներ, ՀՀ դեսպան Վարուժան Ներսեսյանը, հայկական համայնքային կազմակերպությունների ներկայացուցիչներ, ինչպես նաև ամերկահայ հասարակական-քաղաքական գործիչ Աննա Աստվածատրյան-Տուրկոտը, ով հրավիրված էր որպես գլխավոր բանախոս։
Միջոցառումը կազմակերպվել է Կոնգրեսի հայկական հարցերով հանձնախմբի, Հայ Դատի հանձնախմբի, Ամերիկայի Հայկական համագումարի, ԱՄՆ-ում ՀՀ դեսպանության և Արցախի Հանրապետության մշտական ներկայացուցչության համատեղ ջանքերով:
Էջի հասցեն: https://verelq.am/hy/node/60712