Մեր բանակի ձևավորման հենց առաջին օրերից որոշ մարդիկ, այդ թվում՝ նաև դրսի ուժերի թելադրանքով, փորձել են վարկաբեկել մեր բանակը, նսեմացնել մեր հաղթանակները, բայց դա նրանց չի հաջողվել: Այս մասին Եռաբլուր պանթեոնում լրագրողների հետ ճեպազրույցում հայտարարեց ՀՀ երրորդ նախագահ Սերժ Սարգսյանը:
«Մեր բանակը նսեմացնել չի հաջողվել, որովհետև մեծ հաշվով մեր բանակը ձախողումներ չի ունեցել: Մեր բանակը մարտի դաշտում և ոչ մեկ անգամ ապացուցել է իր ունակությունը՝ պաշտպանելու Հայաստանի, հայ ժողովրդի և Արցախի անվտանգությունը», - ասաց նա:
Հանրապետության երրորդ նախագահն ընդգծեց՝ կարևոր է ամուր պահել հավատը բանակի նկատմամբ.
«Չպետք է թույլ տանք, որ մարդիկ ինչ-ինչ նպատակներով փորձեն վարկաբեկել մեր բանակը: Սա անթույլատրելի է»,- հավելեց նա:
Սերժ Սարգսյանը հրաժարվեց պատասխանել վարչապետ Նիկոլ Փաշինյանի մեղադրանքին, թե ինքը մտադրություն ուներ հանձներ 7 շրջանները: Սերժ Սարգսյանը միայն արձագանքեց. «Ուզում եք, որպեսզի ես այս լուսավոր օրը անդրադառնամ ինչ-որ հերյուրանքների՞»: Այնուհետ երրորդ նախագահը հեռացավ՝ չպատասխանելով այլ հարցերին:
VERELQ-ը հիշեցնում է, որ Կապանում կայացած ասուլիսի ժամանակ Փաշինյանն անդրադարձավ Սերժ Սարգսյանի՝ ԼՂ հակամարտության բանակցային գործընթացի մասով թողած ժառանգությանը: Նրա խոսքով, այդ բանակցությունների հիմքը մադրիդյան սկզբունքներն էին:
Էջի հասցեն: https://verelq.am/hy/node/59299