ԱԺ պատգամավոր Վարազդատ Կարապետյանը ֆեյսբուքյան իր էջում տեղեկացնում է, որ մինչեւ հուլիսի 1-ը հետաձգվել է պարտադիր սպանդանոցային մորթի կիրառման գործընթացը: Այս տեղեկատվությունը հաստատել է ԱԺ-ում կառավարության հետ հարցուպատասխանի ժամանակ նաև վարչապետ Նիկոլ Փաշինյանը՝ նշելով, որ մինչ այդ կստեղծվի համապատասխան ենթակառուցվածքները:

Փաշինյանի խոսքով, մինչև փետրվարի 6-ը կառավարությունը կդիտարկի սուբսիդավորվող վարկերի և լիզինգային ծրագրերի այնպիսի կարգավորումներ, որոնցով սպանդանոցների կառուցման և անհրաժեշտ տեխնիկայի, այդ թվում տրանսպորտային տեխնիկայի ձեռքբերման համար կստեղծվեն լավագույն պայմաններ: Վարչապետը նշել է, որ օրենքը կսկսի կիրառվել 2020-ի հուլիսի 1-ից։

Վարազդատ Կարապետյանն իր հերթին նշում է, որ այսօր հանդիպել է Փարաքարում գործող մսամթերքի արտադրությամբ զբաղված ձեռնարկության հետ, ուսումնասիրել շարժական եւ ստացիոնար սարքավորումները։

«Կառավարության, տեղական ինքնակառավարման մարմինների, գյուղացիների, մսագործների, սպանդանոցների հետ մեկ շաբաթից ավել տեւած աշխատանքային քննարկումների արդյունքում այսօր որոշվեց մինչեւ հուլիսի 1-ը հետաձգել պարտադիր սպանդանոցային մորթի կիրառման գործընթացը։ Այս մասին Վարչապետը հայտարարեց Ազգային Ժողովում։

Մինչեւ փետրվարի 6-ը կառավարությունը կմշակի շարժական եւ փոքր սպանդանոցների աջակցության ծրագիր, մարտի 1-ից կմեկնարկի այն։ Մենք պետք է նաեւ հոգ տանենք անասնաբուժական որակյալ ծառայությունների հասանելիության եւ ներկրվող մսի խստացված լաբորատոր հետազոտությունների մասին։

Մենք կոչ ենք անում բոլոր մսագործներին սկսել սպանդանոցների ձեռքբերման, կառուցման եւ կահավորման աշխատանքը։ Սննդամթերքի անվտանգությունը այլընտրանք չունի։

Այսօր հանդիպել ենք Փարաքարում գործող մսամթերքի արտադրությամբ զբաղված ձեռնարկության հետ, ուսումնասիրել շարժական եւ ստացիոնար սարքավորումները։ Ստորեւ դրանց նկարներն են»,- գրել է պատգամավորը։

Այս տարվա հունվարի 15-ից ուժի մեջ է մտել կառավարության ընդունած որոշումը, ըստ որի` Հայաստանի ամբողջ տարածքում վաճառվող միսը պետք է ունենա սպանդանոցում մորթված լինելը հավաստող փաստաթուղթ, ինչն էլ հանդիսանում է անվտանգության երաշխիք։ Այս կարգին դեմ են մսագործերն ու ֆերմերները: