ԱՄՆ-ն խիստ շահագրգռված են ղարաբաղյան հակամարտության կարգավորմամբ: Այս մասին Facebook-ում ուղիղ կապի ժամանակ հայտարարել է Ադրբեջանում ԱՄՆ դեսպան Էրլ Լիտցենբերգերը՝ պատասխանելով սոցիալական ցանցի օգտատիրոջ հարցին, թե եթե ղարաբաղյան հարցի վերաբերյալ ԱՄՆ-ի դիրքորոշումը արդարացի է, ապա ինչու չեն Միացյալ Նահանգները պատժամիջոցներ կիրառում Հայաստանի նկատմամբ:
«Ես հավաստիացնում եմ ձեզ, որ ղարաբաղյան հակամարտության կարգավորումը կարևոր նշանակություն ունի Միացյալ Նահանգների համար: Նշում եմ նաև, որ ես այս թեման քննարկում եմ իմ յուրաքանչյուր հանդիպումների ժամանակ: Միացյալ Նահանգները հանդիսանում է ԵԱՀԿ Մինսկի խմբի համանախագահ երկրներից մեկը, և այս առումով ԱՄՆ-ը համագործակցում են երկու կողմերի հետ և հայտնում են իրենց նվիրվածությունը՝ կատարելու հակամարտության խաղաղ լուծում գտնելու իրենց պարտավորությունները»,- ասել է նա:
Նա ընդգծել է, որ ԱՄՆ ջանքերը հիմնված են Հելսինկիի եզրափակիչ ակտի սկզբունքների վրա:
«Ուզում եմ մեկ անգամ ևս նշել, որ Միացյալ Նահանգները շատ են շահագրգռված ղարաբաղյան հակամարտության լուծմամբ: Գիտեք, մենք պատժամիջոցներ կիրառելու փոխարեն, գերադասում ենք աշխատել երկու կողմերի հետ, որպեսզի նրանց միջև կապ հաստատվի և, ի վերջո, գտնենք այս հակամարտության լուծման ուղիներ», - եզրափակել է դիվանագետը:
Էջի հասցեն: https://verelq.am/hy/node/56115